Talabalar Imom Termiziy markazi faoliyati bilan tanishdi
Imom Termiziy xalqaro ilmiy-tadqiqot markazi tomonidan Termiz davlat universiteti talabalari ishtirokida markaz faoliyati va so‘nggi yillarda chop etilgan nashrlarga bag‘ishlangan ma’naviy-ma’rifiy uchrashuv tashkil etildi.
Tadbirda universitetning Xorijiy filologiya fakulteti professor-o‘qituvchilari hamda talabalari ishtirok etdi. Uchrashuv davomida Termizdan yetishib chiqqan buyuk allomalarning boy ilmiy merosi, markaz tomonidan amalga oshirilayotgan ilmiy-tadqiqot ishlari va yangi nashr etilgan kitoblarning yoshlar ma’naviyatini yuksaltirishdagi ahamiyati haqida so‘z yuritildi.
Shuningdek, qatnashchilar markaz kutubxonasida saqlanayotgan noyob manbalar, qo‘lyozmalar, ilmiy adabiyotlar hamda so‘nggi yillarda chop etilgan yangi asarlar bilan yaqindan tanishdilar.
Tadbir yakunida talaba-yoshlarni qiziqtirgan savollarga soha mutaxassislari tomonidan batafsil javob berildi.
O‘zbekiston musulmonlari idorasi
Matbuot xizmati
Qashqadaryoda 100 nafar o‘quvchiga maktab qurollari sovg‘a qilindi
Yangi o‘quv yili va mustaqilligimizning 35 yilligi arafasida Qashqadaryo viloyatida yana bir xayrli tashabbus amalga oshirildi.
O‘zbekiston musulmonlari idorasi viloyat vakilligi va saxovatpesha yurtdoshlarimiz hamkorligida Qarshi shahridagi 100 nafar ehtiyojmand oila farzandiga yangi o‘quv qurollari to‘plamlari beg‘araz topshirildi.
Qo‘lida yangi portfel va kitob-daftar tutgan jajji o‘quvchilarning yuzidagi samimiy tabassum va quvonch bu ezgu ishning naqadar qadrli ekanini ko‘rsatdi. Zero, ilm istagan qalbga qanot bo‘lish — eng ulug‘ savoblardandir.
Tadbir yakunida xayriyada hissa qo‘shgan barcha saxovatpesha insonlar haqiga duolar qilindi.
O‘zbekiston musulmonlari idorasi
Matbuot xizmati
