Talabalar Imom Termiziy markazi faoliyati bilan tanishdi
Imom Termiziy xalqaro ilmiy-tadqiqot markazi tomonidan Termiz davlat universiteti talabalari ishtirokida markaz faoliyati va so‘nggi yillarda chop etilgan nashrlarga bag‘ishlangan ma’naviy-ma’rifiy uchrashuv tashkil etildi.
Tadbirda universitetning Xorijiy filologiya fakulteti professor-o‘qituvchilari hamda talabalari ishtirok etdi. Uchrashuv davomida Termizdan yetishib chiqqan buyuk allomalarning boy ilmiy merosi, markaz tomonidan amalga oshirilayotgan ilmiy-tadqiqot ishlari va yangi nashr etilgan kitoblarning yoshlar ma’naviyatini yuksaltirishdagi ahamiyati haqida so‘z yuritildi.
Shuningdek, qatnashchilar markaz kutubxonasida saqlanayotgan noyob manbalar, qo‘lyozmalar, ilmiy adabiyotlar hamda so‘nggi yillarda chop etilgan yangi asarlar bilan yaqindan tanishdilar.
Tadbir yakunida talaba-yoshlarni qiziqtirgan savollarga soha mutaxassislari tomonidan batafsil javob berildi.
O‘zbekiston musulmonlari idorasi
Matbuot xizmati
«Qur’on tinchlikka buyuradi»
O‘zbekiston davlat mustaqilligining 35 yilligi munosabati bilan «Qur’on tinchlikka buyuradi» shiori ostida Samarqand shahridagi "Obi Rahmat" jome masjidida Qur’on musobaqasi tashkil etildi. Qur’oni karimga bo‘lgan muhabbatni yuksaltirish, qiroat va tajvid ilmlarini keng targ‘ib etish hamda jamiyatda tinchlik va osoyishtalik g‘oyalarini mustahkamlashga xizmat qiluvchi ushbu xayrli tadbirning saralash bosqichlaridan o‘tgan ishtirokchilar «Hifz» va «Mujavvid» yo‘nalishlari bo‘yicha bellashdi.
G‘olib va sovrindorlar:
«Hifz» yo‘nalishi:
1-o‘rin: Asqar Tursunov (Samarqand shahri, «Muhammadamin ota» masjidi imom-noibi);
2-o‘rin: Abduvakil Olimov (Urgut tumani, «G‘avsul A’zam» masjidi imom-xatibi);
3-o‘rin: Shavkat Mahmudov (Narpay tumani, «So‘fi Ziyrak» masjidi imom-xatibi).
«Mujavvid» yo‘nalishi:
1-o‘rin: Zikrullo Matlabov (Samarqand shahri, «Xo‘ja Abdu Darun» masjidi imom-noibi);
2-o‘rin: Burxoniddin Tursunov (Nurobod tumani, «Jom ota» masjidi imom-xatibi);
3-o‘rin: Isomiddin Isayev (Paxtachi tumani, «Xo‘ja Ziyovuddin» masjidi imom-xatibi).
Qo‘shimcha nominatsiyalar:
«Eng ta’sirchan tilovat»: O‘tkir Abdullayev (Pastdarg‘om tumani);
«Eng go‘zal tilovat»: Sardorxon Sobirov (Samarqand tumani);
«Tajvid qoidalariga eng mukammal rioya qilgan ishtirokchi»: Yusufxon Nizomov (Samarqand shahri).
Tadbir yakunida g‘oliblarga O‘zbekiston musulmonlari idorasi viloyat vakilligining diplomlari va «Vaqf» fondi filiali tomonidan qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
