Rahmon Zotni tanish g‘am-tashvishlarni ketkazadi
Agar muhabbating bo‘lsa aniq haqiqat,
Bo‘lar boshqasi behudalikdan iborat.
Alloh taolo saxiylarning eng saxiysi, karamlilarning eng karamlisidir. Bandasiga so‘ramagan narsalarini ham beradi, ozgina ibodat evaziga ham uni maqtab, savoblarini ko‘paytirib beradi. Xato va kamchiliklarini esa kechirib o‘chirib yuboradi. Osmonlaru yerdagilarning barchasi U zotdan so‘raydi, lekin birini eshitish boshqasini eshitishdan mashg‘ul qilib qo‘ymaydi, so‘rovlarning ko‘pligi Uni chalkashtirmaydi, qattiq turib olib so‘raganlarning bu ishlari Uni ranjitmaydi, balki ana shunday ko‘p so‘rovchilarni yaxshi ko‘radi. So‘ralsa yaxshi ko‘radi, so‘ralmasa g‘azab qiladi.
Bandasi so‘raganda bermaslikka hayo qiladi, lekin banda hayo qilmay gunoh qilaveradi. Banda o‘zining gunohlarini to‘smasa ham Alloh ularni berkitadi, banda o‘ziga zulm qilsada Alloh unga rahm qiladi. Qalblar faqat Ugina yaxshiliklar beradigan va gunohlarni kechiradigan zotni qanday sevmasin? Axir, U zot duolarni ijobat qiladi, xatolarni kechiradi, ayblarni berkitadi, qiyinchilik va g‘am-tashvishlarni aritadi.
Alloh... U zot eng rahimli, ko‘plab ne’matlarni beradigan va panoh so‘raladiganlarning eng buyugidir. U bandaning tavakkul qilishiga kifoya va bandalariga ota-onasidanda mehribon zot. Bandasining tavbasidan cho‘lu biyobonda bor oziq-ovqati bilan tuyasini yo‘qotib qo‘yib, o‘limiga oz qolgan va hayotdan umidini uzgan vaqtda tuyasini topib olgan kishining xursandchiligidan ko‘ra xursand bo‘ladi.
Shu’la: Qaroringiz doimo tajriba orttirib saodatga erishish bo‘lsin.
Doktor Oiz al-Qarniyning
"Dunyodagi eng baxtli ayol" kitobidan
Muqaddas maskanga munosabat qanday bo‘lishi kerak?
Imom Buxoriy majmuasi nafaqat O‘zbekiston, balki butun islom olami uchun ulug‘ va muqaddas qadamjolardan biri hisoblanadi.
Hazrat Imom Buxoriydek buyuk muhaddis nomi bilan bog‘liq ushbu majmua bugun yurtimizning eng yirik ma’naviy va madaniy markazlaridan biriga aylangan. Har kuni minglab ziyoratchilar bu yerga kelib, ajdodlar merosi, ma’rifat va muqaddas tarix bilan yuzlashmoqda.
Majmua nafaqat ziyoratgoh, balki xalqimizning boy ma’naviy merosi, milliy me’morchiligi va islom sivilizatsiyasidagi o‘rnini namoyon etuvchi noyob madaniy ob’yektdir. Uni barpo etish uchun katta mehnat, yuksak mahorat va qimmatbaho qurilish materiallari sarf etilgan. Shu bois bu qutlug‘ maskanni asrab-avaylash har birimiz uchun muhim vazifadir.
Yaqinda Madaniy meros agentligi tomonidan ayrim ziyoratchilarning majmua hududida beparvo munosabatda bo‘layotgani haqida ma’lumot berildi. Ayrim holatlarda ustunlar, ayvonlar va muzey eksponatlariga ehtiyotsiz munosabatda bo‘lish, chiqindilarni duch kelgan joyga tashlash kabi holatlar kuzatilmoqda. Bu esa nafaqat ziyoratgoh ko‘rkiga, balki uning ma’naviy muhitiga ham salbiy ta’sir ko‘rsatadi.
Bu holat barchamizni sergaklikka chaqirishi kerak. Zero, muqaddas qadamjoga kelgan inson avvalo o‘zini munosib tutishi, tozalik va tartib-qoidalarga amal qilishi lozim. Chunki ziyoratgoh — oddiy sayrgoh emas. Bu yerda asrlar nafasi, buyuk ajdodlar ruhi va ma’rifat ziyosi mujassam.
Tozalik esa inson madaniyatining eng muhim ko‘rsatkichlaridan biri. Islom ta’limotida ham poklikka alohida ahamiyat berilgan. Payg‘ambarimiz Muhammad alayhissalom “Tozalik — iymonning yarmidir”, deya ta’kidlaganlar. Demak, ziyoratgoh hududida ozodalikni saqlash nafaqat fuqarolik burch, balki ma’naviy mas’uliyat hamdir.
Ayniqsa, chet ellik mehmonlar O‘zbekiston haqidagi ilk taassurotni aynan shunday muqaddas maskanlar orqali oladi. Agar ziyoratgoh ozoda, tartibli va fayzli bo‘lsa, bu xalqimizning yuksak madaniyati va ma’naviyatini namoyon etadi. Aksincha, beparvolik va tartibsizlik mamlakatimiz nufuziga salbiy ta’sir ko‘rsatishi mumkin.
Yosh avlodni ziyoratgoh madaniyati ruhida tarbiyalash ham muhim ahamiyatga ega. Bolalar kattalardan ibrat oladi. Agar ota-ona muqaddas joyda tartibga amal qilsa, ehtiyotkor bo‘lsa, farzand ham shu ruhda tarbiya topadi. Shu bois har bir inson o‘z harakati bilan boshqalarga namuna bo‘lishi kerak.
Imom Buxoriy majmuasi — millatimiz g‘ururi va ma’naviy boyligi. Uni asrash, tozaligini saqlash va ehtirom bilan munosabatda bo‘lish har bir insonning vijdoniy burchidir. Ziyoratgohlarga bo‘lgan munosabatimiz orqali biz o‘z madaniyatimiz, ma’naviyatimiz va ajdodlar merosiga bo‘lgan hurmatimizni namoyon etamiz.
Asliddin Mustafoyev, majmua axborot xizmati rahbari.
O‘zbekiston musulmonlari idorasi Matbuot xizmati
