Otinoyilar uchun navbatdagi mahorat darsi o‘tkazildi
Buxoro shahridagi muhtasham Mir Arab oliy madrasasi binosida viloyatdagi diniy soha xodimlari va otinoyilar uchun «Ilmiy maqola yozish, tadqiqot metodologiyasi va manbashunoslik» mavzusida amaliy seminar tashkil etildi.
Bahouddin Naqshband ilmiy-tadqiqot markazi tomonidan "TAMADDUN" loyihasi doirasida o‘tkazilgan ushbu tadbir diniy soha vakillarining ilmiy salohiyatini oshirish, tadqiqotchilik ko‘nikmalarini shakllantirish hamda ularga ilmiy maqola yozish uslublarini o‘rgatishga qaratildi.
Seminar davomida ishtirokchilarga ilmiy tadqiqotlarni to‘g‘ri tashkil etish, qadimiy manbalar bilan ishlash, respublika va xalqaro jurnallarda maqolalar chop etish talablari hamda nufuzli ilmiy anjumanlarda ishtirok etish imkoniyatlari haqida atroflicha ma’lumotlar berildi.
Tadbirda markaz ilmiy xodimlari Go‘zal Najmidinova, Gavhar Istamova va Dilafruz G‘ulomova o‘z ma’ruzalari bilan ishtirok etib, tinglovchilarga zarur metodik tavsiyalarni baham ko‘rdilar. Qizg‘in bahs-munozaralarga boy bo‘lgan seminar yakunida ishtirokchilar o‘zlarini qiziqtirgan savollariga javob oldilar va mavzu yuzasidan o‘zaro fikr-mulohaza almashdilar.
O‘zbekiston musulmonlari idorasi
Matbuot xizmati
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati
