Qatar muzeyida yangi eksponatlar taqdim etildi
Doxadagi Islom san'ati muzeyida Janubi-Sharqiy Osiyo mamlakatlariga oid eksponatlarni namoyish etadigan yangi ko'rgazma ochildi, deb xabar bermoqda “Rossiya-1” telekanali.
Ekspozitsiyada Yava orolidan XIX-asrga oid nodir Qur'oni karim qo'lyozmalari, indoneziyaliklarning Makkaga qilgan ziyoratiga oid fotografik dalillar, arab xattotligi tushirilgan asarlar, shuningdek, zargarlik buyumlari, kiyim-kechak va uy-ro'zg'or buyumlari o'rin olgan.
Tarixdan ma'lumki, Janubiy va Sharqiy Osiyoda islomning tarqalishi Malayziya, Indoneziya va Hitoyda musulmon madaniyatining shakllanishiga yordam berdi.
“Janubiy-Sharqiy Osiyo san'at galereyalarining ochilishi tashrif buyuruvchilarga bu er asosiy musulmon jamoalarining uyi ekanligini eslatishi kerak. Dunyoning boshqa muzeylaridagi ko'rgazmalar juda kamdan-kam hollarda bu mavzuga bag'ishlanadi”, –dedi muzeyning ko'rgazma loyihalari rahbari Shayka Nosir An-Nasr.
Ko'rgazmada 800 yil avval Yava dengizida cho'kib ketgan kemada topilgan topilmalarga alohida xona ajratilgan.
“Ushbu vitrinda kema halokatida topilgan buyumlar namoyish etilgan. Bu topilmalar o'sha davrdagi mamlakatlar o'rtasidagi iqtisodiy va madaniy aloqalar haqidagi tushunchamizni kengaytirdi. Madagaskardan billur, shisha idishlar, Indoneziyadan oltin, Hitoy kulollari buyumlari bor”, — deya qo'shimcha qildi Shayka Nosir An-Nasir.
Ushbu muzey Fors ko'rfazining arab davlatlarida paydo bo'lgan birinchi turdagi muzeydir. Qadimgi islom arxitekturasi uslubida qurilgan bino Pritsker mukofotining birinchi laureatlaridan biri bo'lgan me'mor Bey Yuming tomonidan ishlab chiqilgan bo'lib, hozirdanoq ko'plab tashrif buyuruvchilarni o'ziga tortmoqda. Mart oyining o'rtalaridan boshlab muzey mehmonlari uchun yangi galereyalar ochiladi.
O'MI Matbuot xizmati
“Azzaman” gazetasi: Yangi O‘zbekistonda keng qamrovli islohotlar amalga oshirilmoqda
Iroqning “Azzaman” gazetasida “O‘zbekiston mustaqilligining o‘ttiz besh yilligi: Davlat barpo etishdan Uchinchi Renessans sari” nomli maqola e’lon qilindi, deb xabar bermoqda “Dunyo” AA.
Maqolada ta’kidlanishicha, O‘zbekistonning mustaqillik yillarida bosib o‘tgan taraqqiyot yo‘li, amalga oshirilgan keng ko‘lamli islohotlar hamda mamlakatning xalqaro maydondagi nufuzi tobora yuksalib bormoqda.
1991 yilda qo‘lga kiritilgan mustaqillik O‘zbekiston xalqi hayotida tarixiy burilish yasab, milliy davlatchilik asoslarini shakllantirish, iqtisodiy taraqqiyot poydevorini yaratish va ijtimoiy barqarorlikni ta’minlash jarayonini boshlab berdi.
2016 yildan boshlab Prezident Shavkat Mirziyoyev rahbarligida mamlakatda “Yangi O‘zbekiston” tamoyili asosida keng qamrovli islohotlar amalga oshirilmoqda. Ushbu jarayonda O‘zbekiston Markaziy Osiyoda izchil va muvozanatli rivojlanish yo‘lidan borayotgan davlat sifatida e’tirof etilmoqda.
Muallif O‘zbekistonda so‘nggi yillarda iqtisodiyotni liberallashtirish, investitsiyalarni jalb etish, savdo-iqtisodiy aloqalarni kengaytirish, infratuzilmani modernizatsiya qilish, raqamlashtirish va tadbirkorlik muhitini yaxshilash borasida amalga oshirilgan chora-tadbirlarga e’tibor qaratgan.
Maqolada aholini ijtimoiy himoya qilish tizimini takomillashtirish, ta’lim va sog‘liqni saqlash xizmatlari sifatini oshirish, yoshlar hamda xotin-qizlarning jamiyatdagi faolligini kuchaytirishga qaratilgan islohotlar haqida ham alohida fikr yuritilgan.
Nashrda Prezident Shavkat Mirziyoyev tomonidan ilgari surilgan “Uchinchi Renessans” g‘oyasi O‘zbekiston taraqqiyotining muhim strategik yo‘nalishlaridan biri sifatida baholangan. Unda Xorazmiy, Beruniy, Ibn Sino, Imom Buxoriy va Imom Termiziy kabi buyuk allomalar yetishib chiqqan yurt bugungi kunda ilm-fan, innovatsiya, texnologiya va inson kapitalini rivojlantirish orqali yangi uyg‘onish davrini yaratishga intilayotgani qayd etilgan.
Iroq matbuoti O‘zbekistonning islom sivilizatsiyasi tarixidagi o‘rniga ham to‘xtalib, mamlakatda boy ilmiy-ma’rifiy merosni o‘rganish va targ‘ib qilishga qaratilgan loyihalar amalga oshirilayotganini ta’kidlagan. Jumladan, Toshkent shahrida bunyod etilgan Islom sivilizatsiyasi markazi Movarounnahr allomalarining jahon tamadduniga qo‘shgan ulkan hissasini namoyish etuvchi muhim ilmiy-madaniy maskan sifatida qayd etilgan.
O‘zbekiston musulmonlari idorasi Matbuot xizmati
