Xoja Buxoriy madrasasida "Xatmona – 2026" tadbiri o‘tkazildi
Qashqadaryo viloyatidagi Xoja Buxoriy o‘rta maxsus islom ta’lim muassasasida 32-bitiruvchi kurs talabalari uchun bag‘ishlangan "Xatmona–2026" tantanali tadbiri bo‘lib o‘tdi.
Tadbirda O‘zbekiston musulmonlari idorasining Qashqadaryo viloyati bosh imom-xatibi Rahmatillo domla Usmonov, viloyat hokimligi vakillari, muassasa rahbariyati, ustozlar va bitiruvchilar qatnashdi.
Marosimni ta’lim muassasasi mudiri O‘tkir G‘uzarov ochib, yoshlarga ilm va ma’rifat yo‘lida sobitqadamlik tiladi. Shundan so‘ng viloyat bosh imom-xatibi Rahmatillo domla Usmonov so‘zga chiqib, bitiruvchilarga ilm fazilati, ustozga hurmat hamda dinimiz va xalqimiz yo‘lida sidqidildan xizmat qilish mas’uliyati haqida qimmatli nasihatlar qildi.
Tadbir davomida ustozlar va talabalarning dildan suhbatlari, xotiralari tinglandi.
Yakunda ilm yo‘lida alohida o‘rnak ko‘rsatgan bitiruvchilarga esdalik sovg‘alari va tashakkurnomalar topshirildi.
Tantanali marosim xayrli duolar bilan yakunlandi.
Xoja Buxoriy islom ta’lim muassasasi
Matbuot xizmati
Imomlar BAAda zamonaviy uslub va ilg‘or tajribalarni o‘rganmoqda
O‘zbekiston musulmonlari idorasi hamda Birlashgan Arab Amirliklari Islom ishlari va vaqflar bosh boshqarmasi hamkorligida o‘zbekistonlik imom-xatiblar uchun BAAda malaka oshirish o‘quvlari boshlandi. Bu haqda mazkur jarayonda ishtirok etayotgan Masjidlar bilan ishlash bo‘limi xabar berdi.
Mazkur o‘quv kurslarining asosiy maqsadi ikki qardosh mamlakat diniy soha vakillari o‘rtasida o‘zaro tajriba almashish, ilg‘or ma’rifiy yondashuvlar, zamonaviy ish usullari hamda dolzarb diniy-ijtimoiy masalalar yuzasidan fikr almashishdan iboratdir.
Safar doirasida bo‘lib o‘tgan navbatdagi ilmiy-amaliy mashg‘ulot davlatchilik asoslari, bag‘rikenglik madaniyati va zamonaviy diniy-ijtimoiy yondashuvlar mavzusiga bag‘ishlandi. Unda BAAning taraqqiyot yo‘li, qonun ustuvorligi va jamiyat barqarorligida «vasatiyya» (mo‘tadillik) tamoyilining o‘rni muhimligi ta’kidlandi. 200 dan ortiq millat va elat vakillari tinch-totuv istiqomat qilayotgan ushbu mamlakatda inson qadri va o‘zaro hurmat asosiy mezon ekaniga urg‘u berildi.
O‘z navbatida, BAA tomoni O‘zbekistonning boy sivilizatsiyasi va dunyo tamadduniga ulkan hissa qo‘shgan buyuk allomalarimiz merosini yuksak ehtirom bilan tilga oldi.
Malaka oshirish jarayonida ishtirokchilar masjidlar faoliyatini tashkil etish, jamiyatda ma’naviy muhitni mustahkamlash, xususan, ma’ruza va suhbatlarni zamonaviy axborot texnologiyalari — interaktiv taqdimotlar va proyektorlar orqali ko‘rgazmali yetkazish bo‘yicha ilg‘or amaliyotlar bilan yaqindan tanishmoqdalar.
Tadbir davomida BAA rahbariyatining global miqyosdagi insonparvarlik va xayriya tashabbuslari ham alohida e’tirof etilib, ikki tomonlama hamkorlikni rivojlantirish va diniy soha xodimlarining kasbiy salohiyatini oshirishga qaratilgan mazkur manfaatli safarni tashkil etgan mutasaddilarga samimiy minnatdorlik bildirildi.
O‘zbekiston musulmonlari idorasi
Matbuot xizmati
