Futbol muxlislariga nasihat
#maqola #futbol
Qadrli tomoshabin do‘stlar! Bir-biringizga muloyim bo‘ling. Bu koptok degan narsa o‘tadi ketadi. Uni deb o‘zimizni pastkash qilishimizga arzimaydi. Uni deb atrofdagilarning dilini og‘ritish kerak emas. Payg‘ambarimiz sollallohu alayhi va sallam aytganlar: “O‘zaro hasad qilmang, o‘zaro adovat qilmang, bir-biringizdan yuz o‘girib ketmang. Allohning aka-uka bandalari bo‘ling”.
Baliq daryodan chiqishi bilan o‘lganidek, futbol ham maydondan chiqishi bilan tugashi kerak. Futboldagi raqobat o‘sha yerda qolsin. Musobaqa bo‘lsin, lekin yomon ko‘rish bo‘lmasin. Jo‘shib keting, ammo adovat qilmang. Futbolchilarni ruhlantirib turing, biroq haqorat qilmang. Kuzating, lekin taassub qilmang. Tadbirlarga qatnashing, ammo qo‘pol bo‘lmang. Tahlil qiling, lekin so‘kmang. Mag‘lubiyat bo‘lsa azoblanmang.
Tomoshabin janoblari! Umringizni ko‘r muxlislik, o‘yinchilarning hayotiy ma’lumotlari, chempionatlarni qayta-qayta ko‘rish, xavfli vaziyatlarni tahlil qilaverish bilan o‘tkazib yubormang.
U bugun va kelajagingizdir. Umringiz oxiratingizni hal qiladigan sarmoyangizdir.
Jamoangiz birinchilikdan golsiz chiqsa ichingizni yeb bitirasizu, ammo butun boshli hayotingiz maqsadsiz, golsiz o‘tayotganini eslab ham qo‘ymaysiz.
Muhim narsalarni tartiblab oling. Ishqibozlik asosiy g‘amingiz bo‘lmasin. Bu ketishda sevimli guruhingiz sizni muvaffaqiyatdan to‘sib qo‘yishi muqarrar. Jamoangiz sizni cho‘kishdan qutqarib qola olmaydi. Uyg‘oning.
Namozlarni ham tark etib, maydonga (ekranga) ertachi kelib olmang. Futbol ko‘raman deb namozlarni qazo qilmang. Zimmangizdagi majburiyatlaringizga o‘yin deb loqayd qaramang. Hakamlar chiqargan qarorlarga aralashermang. Birovning sharafi, sha’nini yerga urmang. Futbolni deb savoblaringizni kulga aylantirmang. Futbol ortidan aloqalarni uzib, birov bilan adovatga bormang. Oilangiz oldidagi vazifalarni tashlab qo‘ymang. Futbolni deb bolalaringizga zarda qilmang, ularga baqirmang. Avvalo, o‘zingizni isloh qiling.
Ësir ibn Badrning “Siz izlagan yechim” kitobidan
Hadis ilmi maktabi o‘qituvchisi
Abdulbosit Abdulvohid o‘g‘li tarjimasi
Imomlar BAAda zamonaviy uslub va ilg‘or tajribalarni o‘rganmoqda
O‘zbekiston musulmonlari idorasi hamda Birlashgan Arab Amirliklari Islom ishlari va vaqflar bosh boshqarmasi hamkorligida o‘zbekistonlik imom-xatiblar uchun BAAda malaka oshirish o‘quvlari boshlandi. Bu haqda mazkur jarayonda ishtirok etayotgan Masjidlar bilan ishlash bo‘limi xabar berdi.
Mazkur o‘quv kurslarining asosiy maqsadi ikki qardosh mamlakat diniy soha vakillari o‘rtasida o‘zaro tajriba almashish, ilg‘or ma’rifiy yondashuvlar, zamonaviy ish usullari hamda dolzarb diniy-ijtimoiy masalalar yuzasidan fikr almashishdan iboratdir.
Safar doirasida bo‘lib o‘tgan navbatdagi ilmiy-amaliy mashg‘ulot davlatchilik asoslari, bag‘rikenglik madaniyati va zamonaviy diniy-ijtimoiy yondashuvlar mavzusiga bag‘ishlandi. Unda BAAning taraqqiyot yo‘li, qonun ustuvorligi va jamiyat barqarorligida «vasatiyya» (mo‘tadillik) tamoyilining o‘rni muhimligi ta’kidlandi. 200 dan ortiq millat va elat vakillari tinch-totuv istiqomat qilayotgan ushbu mamlakatda inson qadri va o‘zaro hurmat asosiy mezon ekaniga urg‘u berildi.
O‘z navbatida, BAA tomoni O‘zbekistonning boy sivilizatsiyasi va dunyo tamadduniga ulkan hissa qo‘shgan buyuk allomalarimiz merosini yuksak ehtirom bilan tilga oldi.
Malaka oshirish jarayonida ishtirokchilar masjidlar faoliyatini tashkil etish, jamiyatda ma’naviy muhitni mustahkamlash, xususan, ma’ruza va suhbatlarni zamonaviy axborot texnologiyalari — interaktiv taqdimotlar va proyektorlar orqali ko‘rgazmali yetkazish bo‘yicha ilg‘or amaliyotlar bilan yaqindan tanishmoqdalar.
Tadbir davomida BAA rahbariyatining global miqyosdagi insonparvarlik va xayriya tashabbuslari ham alohida e’tirof etilib, ikki tomonlama hamkorlikni rivojlantirish va diniy soha xodimlarining kasbiy salohiyatini oshirishga qaratilgan mazkur manfaatli safarni tashkil etgan mutasaddilarga samimiy minnatdorlik bildirildi.
O‘zbekiston musulmonlari idorasi
Matbuot xizmati
