Hayvon va qushlar jonini kim oladi?
Savol: Hayvonlar, qushlar va hasharotlarning jonini ham Azroil alayhissalom qabz qiladimi?
Javob: Bismillahir Rohmanir Rohiym. Mo‘tabar manbalardagi ma’lumotlar barcha jonzotlarning jonini olish mas’uliyatini Alloh taolo O‘lim farishtasi (Azroil) alayhissalomga topshirganini ko‘rsatadi. Chunki bir rivoyatda O‘lim farishtasi alayhissalom: “Men bitta chivinning jonini ham Allohning iznisiz o‘z xohishim bilan sug‘ura olmayman”, deganlari naql qilingan.
Imom Qurtubiy rahimahulloh buning izohida bunday deydilar: “Bu hadisdan ma’lum bo‘ladiki, har bir jonzotning jonini olish mas’uliyatini Alloh taolo O‘lim farishtasiga yuklagan”.
Shuningdek, Imom Molik ibn Anas rahmatullohi alayhdan "Chivinlarning jonini ham Azroil qabz qiladimi?" deb so‘radilar. Shunda imom: “Ularda jon bormi?” deb so‘radi. So‘rovchi: “Ha, bor”, degach, u kishi: “U holda, ularning jonini ham O‘lim farishtasi oladi”, dedilar. Vallohu a’lam.
O‘zbekiston musulmonlari idorasi
Fatvo markazi
O‘zbekiston va Indoneziya ziyorat turizmi sohasida hamkorlikni kengaytirmoqda
Turizm qo‘mitasi raisi Abdulaziz Aqqulov Indoneziya Respublikasi Haj va Umra vaziri Muhammad Irfan Yusuf bilan uchrashdi.
Uchrashuvda turistik almashinuvni kengaytirish, ziyorat turizmini rivojlantirish, to‘g‘ridan to‘g‘ri aviaqatnovlarni yo‘lga qo‘yish va turoperatorlar hamkorligini kuchaytirish masalalari muhokama qilindi.
Turistik oqimni oshirish maqsadida Toshkent–Jakarta, shuningdek, tarixiy shaharlarni to‘g‘ridan to‘g‘ri bog‘lovchi aviaqatnovlarni yo‘lga qo‘yish masalasi muhokama qilindi.
Muloqot davomida Davlat rahbari tomonidan ilgari surilgan yangi aviaqatnovlarni subsidiyalash bo‘yicha mexanizmlarni qo‘llash mumkinligi qayd etildi. Shuningdek, Indoneziyadan sayyoh jalb qilgan mahalliy turoperatorlarga har bir sayyoh uchun 100 AQSH dollari miqdorida subsidiya ajratilishi ham ta’kidlandi.
Indoneziyada har yili 2 milliondan ortiq fuqaro Haj va Umra ziyoratiga yo‘l oladi. O‘zbekistondagi 1 200 dan ziyod ziyorat maskani, jumladan, Imom Buxoriy, Imom Moturidiy, Imom Termiziy va Bahouddin Naqshband merosi Indoneziya bozori uchun muhim turistik salohiyat hisoblanadi.
Indoneziya Haj va Umra vazirining tashrifi doirasida Samarqand va Buxorodagi ziyorat maskanlari bilan tanishuv tashkil etildi. Buxoro va Samarqandni Indoneziya bozorida ziyorat turizmi yo‘nalishlari sifatida targ‘ib qilish, maxsus turlar ishlab chiqish, Haj va Umra operatorlari bilan B2B uchrashuvlar o‘tkazish bo‘yicha kelishuvlarga erishildi.
Imom Buxoriy majmuasi hududida indoneziyalik investorlar ishtirokida “Hadith Hotel” besh yulduzli mehmonxonasining ishga tushirilishi ham ikki mamlakat turizm sohasidagi hamkorlikning amaliy natijalaridan biri bo‘ldi.
To‘g‘ridan to‘g‘ri aviaqatnovlar, “Umra plyus” dasturi, turoperatorlar o‘rtasidagi hamkorlik va ziyorat turizmi infratuzilmasini rivojlantirish O‘zbekistonning Indoneziya bozoridagi mavqeini mustahkamlash hamda turistik oqimni oshirishga xizmat qiladi.
O‘zbekiston musulmonlari idorasi Matbuot xizmati