Ta’ziya
Bismillahir Rohmanir Rohiym
Innaa lillaahi va innaa ilayhi roji’uun!
Mo‘min-musulmonlar, Hindiston diyori, balki butun Islom olami, aqida, hadis, fiqh va siyrat olimi bo‘lgan ustoz alloma, shayx Sayyid Salmon Husayniy Nadaviydan judo bo‘ldi.
Alloh taolo bu muxlis, yuksak martabali olim bandasini rahmatiga chulg‘asin, chekkan mashaqqatlari, tortgan dardlarini kafforat aylasin, diniga, musulmon ummatiga qilgan xizmatlarini, manfaatli ilmlarini sadaqai joriya o‘laroq husni qabul qilsin, qabrlarini muattar va munavvar aylab, Firdavs jannatlariga yetishtirsin!
Mavlono Sayyid Salmon Husayniy Nadaviy hazratlarining ahli baytlariga, yaqinlariga, barcha shogirdu muxlislariga, butun Islom ummatiga samimiy ta’ziya izhor qilamiz, Alloh taolodan sabri jamil so‘raymiz, haqlariga qilinayotgan barcha xayrli duolarni mustajob qilishini tilaymiz.
«Sabrlilarga xushxabar beringki, ular o‘zlariga musibat yetganda "Albatta, biz Allohnikimiz va albatta, biz Unga qaytuvchimiz", deganlardir».
“Oman Daily”: O‘zbekiston islom sivilizatsiyasi merosini xalqaro maydonda keng targ‘ib qilmoqda
O‘monning “Oman Daily” nashrida Toshkent shahrida bo‘lib o‘tgan “Islom sivilizatsiyasi: yangi nigoh, yangi kashfiyotlar” xalqaro mediaforumiga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, anjumanda dunyoning 50 dan ortiq davlatidan 300 nafarga yaqin jurnalist, tadqiqotchi, noshir, kinorejissyor va texnologiya sohasi mutaxassislari ishtirok etdi.
Tadbir qatnashchilari Islom sivilizatsiyasining tarixiy-madaniy merosini zamonaviy media vositalari orqali xalqaro auditoriyaga keng targ‘ib qilish masalalarini atroflicha muhokama qildi.
Maqolada O‘zbekistonning Islom sivilizatsiyasi rivojiga qo‘shgan hissasi, xususan, Al-Xorazmiy, Ibn Sino, Imom Buxoriy, Mirzo Ulug‘bek va Amir Temur kabi buyuk tarixiy shaxslarning boy ilmiy va madaniy merosi alohida e’tirof etilgan.
Shuningdek, Toshkent shahrida qad rostlagan Islom sivilizatsiyasi markazining ushbu tarixiy boylikni atroflicha o‘rganish, asrab-avaylash va xalqaro maydonda tizimli targ‘ib qilishdagi strategik ahamiyatiga alohida e’tibor qaratilgan.
Forum doirasida qadimiy Qur’on qo‘lyozmalari, tarixiy xaritalar, hujjatli filmlar hamda innovatsion raqamli loyihalar taqdimoti bo‘lib o‘tdi. Anjuman ishtirokchilari Islom sivilizatsiyasi haqidagi xalqaro media kontentida mavjud bo‘lgan muayyan stereotiplarni bartaraf etish, uning jahon ilm-fani, madaniyati va umuminsoniy taraqqiyotga qo‘shgan bebaho hissasini xolis hamda keng qamrovli yoritish zarurligini bir ovozdan ta’kidladi.
Gazetada O‘zbekistonning madaniy diplomatiya mexanizmlaridan unumli foydalangan holda mamlakatning boy tarixiy merosi va Islom sivilizatsiyasidagi o‘rnini jahon jamoatchiligiga keng yetkazish borasidagi sa’y-harakatlariga yuqori baho berilgan.
O‘zbekiston musulmonlari idorasi Matbuot xizmati
