Ustunlik - o‘z ishini mukammal bajarishda
Badavlat insonlarning biri aytadi: "Meni alohida hissiyotlar boshqarmaydi. Chunki men dunyodagi eng badavlat insonman. Oddiy hayotda, kichik bir uyda ayolim bilan yashayman. Spirtli ichimliklar ichmayman, chekmayman. Suratlari gazetalarni to‘ldirib yuborgan, sohillardagi qasrlarda yashaydigan, hayotlari shovqin suronli bo‘lgan va nikohlari go‘zal qizlar bilan bo‘ladigan milliarderlar hayotiga oshiq bo‘lmayman. Ularning bu nikohlari odatda evaziga millionlab dollar beriladigan ajralish bilan tugaydi.
O‘z ishimni sevaman, u bilan baxtliman. Ko‘pincha ish joyimda yeyish uchun taomimni olib ketaman. Qo‘limga million dollar tushib qolishini tasavvur qilsam xayollarimni shodlik qurshab olmaydi, ammo ona shahrimning rivojlanishiga go‘zal ko‘chalar qurish bilan hissa qo‘shayotganimni o‘ylasam shodlanib ketaman. U bugun men qurayotgan yo‘llar bilan dunyoning eng go‘zal shaharlaridan biri bo‘layotganidan xursand bo‘laman. Qisqa qilib aytganda mening baxtim ishimni mukammal ado etishimdadir".
Shu’la: Afsus-nadomat kemani dengiz chuqurliklaridan chiqara olmaydi.
Doktor Oiz al-Qarniyning
"Dunyodagi eng baxtli ayol" kitobidan
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
