Xalqaro forumda diniy-ma’rifiy sohadagi islohotlarga yuksak baho berildi
Avval xabar berganimizdek, Birinchi xalqaro islom sivilizatsiyasi forum doirasida yalpi majlislar va sho‘ba yig‘ilishlari qizg‘in ruhda o‘tkazildi.
Xususan, "Yangi O‘zbekistonda diniy-ma’rifiy sohadagi islohotlar: Uchinchi Renessansning innovatsion g‘oyalari va strategik yo‘nalishlari" mavzusidagi III yalpi majlis doirasida Din ishlari bo‘yicha vazirlar sho‘basi yig‘ilishi bo‘lib o‘tdi.
Ushbu nufuzli tadbirda O‘zbekiston Respublikasi Din ishlari bo‘yicha qo‘mitasi raisi Sodiq Toshboyev, Ozarbayjon Respublikasi Diniy tashkilotlar bilan aloqalar qo‘mitasi raisi Ramin Mamedov, Malayziya Din ishlari vaziri Zulkifli Hasan, Qozog‘iston Respublikasi Din ishlari qo‘mitasi raisi Anvar Xatiyev hamda Qirg‘iziston Respublikasi Prezidenti huzuridagi Din ishlari va millatlararo munosabatlar milliy agentligi direktori Talantbek Tashibekov kabi soha rahbarlari va xalqaro spikerlar ishtirok etdilar.
Sho‘ba yig‘ilishi davomida mahalliy va xalqaro spikerlar tomonidan Yangi O‘zbekistonda diniy-ma’rifiy sohada amalga oshirilayotgan keng ko‘lamli islohotlar, Uchinchi Renessans poydevorini yaratishga qaratilgan innovatsion g‘oyalar hamda strategik yo‘nalishlar haqida ma’ruzalar qilindi.
Muloqotlar chog‘ida xorijlik vazirlar va qo‘mita rahbarlari yurtimizda ajdodlar merosini asrab-avaylash, vijdon erkinligini ta’minlash hamda dinlararo bag‘rikenglikni mustahkamlash yo‘lida amalga oshirilayotgan islohotlarga yuksak baho berdilar.
Shuningdek, mazkur o‘zgarishlar xalqaro hamkorlikni
yangi bosqichga olib chiqishda muhim platforma
bo‘lib xizmat qilayotganini alohida e’tirof etdilar.
Din ishlari bo‘yicha qo‘mita
Axborot xizmati
Ot izini toy bosar
Bismillahir Rohmanir Rohiym
O‘g‘il har oylik maoshini onasiga topshirar, uning yuzidagi tabassumni ko‘rib, o‘zini dunyodagi eng boy inson deb hisoblardi.
Yillar o‘tib, onasi olamdan o‘tdi. Navbatdagi maoshini olgan o‘g‘il bir zum ne qilarini bilmay qoldi-yu, bir qarorga keldi: «Pullarni onamning nomidan ehson qilaman».
Shu kundan e’tiboran, u har oy masjidlarga suv kullerlari o‘rnatishni odat qildi. Namozxonlar suv ichib, onasining haqiga duo qilishlaridan qalbi taskin topardi.
Kunlardan bir kun mahalla masjidida yangi kuller o‘rnatilganini ko‘rib, «Attang, bu safar kechikdim-a», deb o‘kindi. Shunda yoniga imom kelib:
– Xayrli hadya uchun rahmat, – dedi.
– Uzr, adashdingiz, shekilli. Buni men olib kelmadim...
– Yo‘q, adashmadim. Buni sizning nomingizdan o‘g‘lingiz keltirdi.
Orqasiga o‘girilgan ota jilmayib turgan o‘g‘liga ko‘zi tushdi.
– Bolam, bunga pulni qayerdan olding? – hayajondan ko‘zlari yoshlandi otaning.
– Ota, anchadan beri menga beradigan pullaringizni yig‘ib yurgandim. Siz buvijonim uchun xayrli ish qilayotganingizni ko‘rib, men ham siz uchun shunday qilishni istadim.
Otaning ko‘zlaridan quvonch yoshlari sizib chiqdi. U o‘g‘liga nasihat qilmagan, shunchaki o‘z amali bilan namuna bo‘lgandi.
Ha, farzandlar eshitgan gaplarini unutishi mumkin, ammo ko‘rgan amallarini hech qachon unutmaydi. Bugun ota-onamizga qilgan yaxshiligimiz ertaga farzandlarimizdan albatta qaytadi.
Akbarshoh RASULOV