"Ko‘kaldosh" bilim yurti ustozlari Turkiyada malaka oshirmoqda
Turkiyaning nufuzli Qorabuk (Karabük) universitetida ilmiy-amaliy malaka oshirish kurslarida ishtirok etayotgan «Ko‘kaldosh» o‘rta maxsus islom bilim yurti mudarrislari uchun belgilangan dastur asosida seminar va uchrashuvlar tizimli davom etmoqda.
Dastlab yurtimiz vakillari universitet tarixi, ta’lim tizimi va ilmiy faoliyati bilan yaqindan tanishdilar. So‘ng universitet Ilohiyot fakulteti dekani, doktor Abdujabbor Kavak ishtirokida ilmiy-amaliy seminar tashkil etildi. Unda ta’lim dargohining ilmiy salohiyati va xalqaro hamkorlik yo‘nalishlari haqida atroflicha ma’lumot berildi.
Yurtimizdagi diniy ta’lim islohotlari taqdimot qilindi
Dastur doirasida O‘zbekistondagi diniy ta’lim tizimidagi ijobiy o‘zgarishlar «Ko‘kaldosh» bilim yurti misolida xorijlik hamkorlarga taqdim etildi:
-
Ahror domla Abdullayev (bilim yurti mudarrisi) arab tilida ma’ruza qilib, yurtimizdagi diniy-ma’rifiy sohada amaliyotga tadbiq etilayotgan islohotlar mazmun-mohiyatini ochib berdi;
-
Aliakbar domla Abdullayev esa o‘quv jarayonlarini tashkil etish, ta’lim sifatini nazorat qilish va ilmiy-amaliy faoliyatni yo‘lga qo‘yish bo‘yicha mazmunli taqdimot o‘tkazdi.
Tajriba almashinuv: Hafta davomida Qorabuk universiteti professor-o‘qituvchilari bilan zamonaviy pedagogik yondashuvlarni joriy etish yuzasidan fikr almashildi. Shuningdek, vakillarimiz Turkiyadagi mashhur «Imom-xatib» litseylari faoliyati va ularning ilg‘or tajribalarini joylarga chiqqan holda o‘rgandilar.
Safar yakunida universitet rahbariyati bilan rasmiy uchrashuv bo‘lib o‘tdi. Muloqotda ikki ta’lim muassasasi o‘rtasida o‘zaro tajriba almashishni bardavom qilish, qo‘shma ilmiy loyihalarni amalga oshirish va istiqboldagi hamkorlik rejalari kelishib olindi.
"Ko‘kaldosh" o‘rta maxsus islom bilim yurti
Matbuot xizmati
Imom-xatiblar: «Islom sivilizatsiyasi markazi Uchinchi Renessans g‘oyasining amaliy ifodasi»
O‘zbekistonda Uchinchi Renessans g‘oyasini hayotga tatbiq etish, milliy va diniy merosni chuqur o‘rganish hamda ma’naviy-ma’rifiy bilimlarni kengaytirishga qaratilgan tashabbuslar doirasida Farg‘ona, Qashqadaryo va boshqa hududlardan kelgan imom-xatiblar O‘zbekistondagi Islom sivilizatsiyasi markazida bo‘ldilar. Ular Markazdagi muzey ekspozitsiyalari, noyob qo‘lyozmalar, Renessans davrlariga bag‘ishlangan bo‘limlar va zamonaviy interaktiv yechimlar bilan tanishib, ushbu maskanni ilm, ta’lim va ma’naviyatni uyg‘unlashtirgan muhim milliy platforma sifatida baholadilar, xabar bermoqda iccu.uz.
Farg‘ona viloyati Buvayda tumani «Katta mahalla» masjidi imom-xatibi Rahmatulloh G‘oyibnazarov Prezident Shavkat Mirziyoyev tashabbusi bilan barpo etilgan mazkur Markazni yosh avlod uchun muhim ma’rifat maskani sifatida baholadi.
«Bu yerda Birinchi va Ikkinchi Renessans davrlari, buyuk allomalarimiz qoldirgan ilmiy meros va mamlakatimiz taraqqiyoti haqidagi ekspozitsiyalarni ko‘rib katta taassurot oldik. Bu yerga kelgan har bir inson o‘z tarixini chuqurroq anglaydi, yoshlar esa ilmga va vatanparvarlikka yanada ko‘proq intiladi. Bu yerda olgan bilim va taassurotlarimizni xalqimizga yetkazishni o‘zimizga vazifa deb bilamiz», — dedi u.
Farg‘ona viloyati Qo‘shtepa tumani bosh imom-xatibi, «Muborak» jome masjidi imom-xatibi Otabek Xolmurodov Markaz kutubxonasida ilmiy izlanishlar uchun yaratilgan sharoitlarga e’tibor qaratdi.
Uning ta’kidlashicha, elektron kitoblar fondi, Brayl alifbosidagi adabiyotlar, maxsus tadqiqot xonalari va noyob manbalarning bir joyda jamlangani Markazni nafaqat muzey, balki keng qamrovli ilmiy resurs markaziga aylantirgan.
«Bu kutubxona ilmiy izlanish bilan shug‘ullanuvchilar uchun haqiqiy bilim maskani ekan. Bu yerda yaratilgan sharoitlar ilm ahlini yanada ko‘proq izlanishga undaydi. Biz bu imkoniyatlar haqida yoshlarimizga albatta targ‘ibot olib boramiz», — dedi u.
Farg‘ona viloyati Bag‘dod tumani bosh imom-xatibi Ahmadxon Nizomov esa Markazning ilmiy konsepsiyasiga alohida to‘xtaldi.
Uning fikricha, har bir ekspozitsiya ortida keng ko‘lamli tadqiqotlar va ilmiy izlanishlar mujassam bo‘lib, bu yerdagi interaktiv muhit tashrif buyuruvchilarni faqat tomoshabin emas, balki izlanuvchiga aylantiradi.
«Bu yerga bir marta kelib barchasini to‘liq anglash qiyin. Har bir ekspozitsiya ortida katta ilmiy mehnat mujassam. Ayniqsa, allomalarimiz merosi, tadqiqot markazlari va interaktiv imkoniyatlar insonni yanada chuqur izlanishga chorlaydi. Bu maskan kelajak avlod uchun ulkan ma’naviy boylik va Yangi O‘zbekistonning ilm-fan taraqqiyotiga xizmat qiladigan muhim poydevordir», — dedi u.
Tashrif yakunida ishtirokchilar Markazda jamlangan boy ilmiy va madaniy meros, raqamli ekspozitsiyalar hamda ta’lim imkoniyatlarini keng jamoatchilik, ayniqsa yoshlar o‘rtasida targ‘ib qilish Uchinchi Renessans g‘oyalarini hayotga tatbiq etish, milliy o‘zlikni anglash va ilmiy merosga qiziqishni yanada kuchaytirishga xizmat qilishini qayd etdilar.
O‘zbekiston musulmonlari idorasi Matbuot xizmati