London Ramazonga tayyorlanmoqda
2023 yilning 5 mart kuni Londondagi “Viktoriya” va “Albert” muzeyida Ramazon oyiga tayyorgarlik munosabati bilan anjuman o'tkaziladi.
"Event Brite"matbuot xizmati xabariga ko'ra, ushbu tadbir “Hush kelibsiz Ramazon konferentsiyasi” nomida bo'lib o'tadi.
Tashkilotchilar fikricha, ushbu tadbir Britaniya musulmon jamoasining Ramazonga tayyorlarlik ko'rish maqsadida o'tkazilmoqda. Bu esa “Ramazon chodiri” loyihasining bir qismidir.
Londonda ilk bor “Ramazon chodiri” loyihasi 2011 yilda London Sharq va Afrika tadqiqotlari maktabi (SOAS) bir guruh talabalari tomonidan tashkil etilgan edi. Unda talabalar universitet bog'ida kichik chodir o'rnatib, yo'lovchilarni o'zlariga qo'shilishga taklif qilishgan va bu xalqaro e'tirofga sazovor bo'lgan edi.
Anjuman tashkilotchilarining xabarida bunday deyiladi: “Biz olimlar, faollar, fuqarolik jamiyati va xayriya tashkilotlari keng jamoatchilikni Ramazon oyining musulmonlar uchun ahamiyatli ekaniga bag'ishlangan bir qator mehr-muhabbat ulashadigan tadbirlarda ko'rishdan mamnunmiz”.
Mazkur loyiha doirasida London, Manchester, Plimut, Ndola, Toronto, Portlend va Istanbul shaharlarida turli tadbirlar bo'lib o'tadi. Kelgusida bu loyiha kengaytirilib notijorat tashkilotga aylanishi ko'zda tutilgan.
O'zbekiston musulmonlari idorasi Matbuot xizmati
Hindistonlik general: «Usmon Mus'hafi men uchun eng ta’sirli eksponat bo‘ldi»
Hindiston Respublikasi Mudofaa vazirligi kotibiyati boshlig‘i, general Dinesh Kumar O‘zbekistondagi Islom sivilizatsiyasi markaziga tashrif buyurdi. Markaz bilan tanishuv davomida mehmon, ayniqsa, Usmon Mus'hafini ko‘rib chuqur taassurot olganini ta’kidlab, uni bu yerdagi eng noyob va unutilmas yodgorliklardan biri, deya e’tirof etdi.
Tashrif chog‘ida general Dinesh Kumar muzeyning boy ekspozitsiyalari bilan batafsil tanishdi. U islomgacha bo‘lgan davr sivilizatsiyasi, Islom sivilizatsiyasining taraqqiyot bosqichlari, Birinchi va Ikkinchi Renessans davrlariga bag‘ishlangan galereyalar, buyuk allomalarning hayoti va ilmiy merosi, nodir qo‘lyozmalar hamda zamonaviy raqamli texnologiyalar asosida yaratilgan interaktiv ekspozitsiyalarni katta qiziqish bilan ko‘zdan kechirdi.
Mehmon ekspozitsiyalar tarixiy merosni zamonaviy muzeyshunoslik yechimlari orqali jonli va ta’sirchan tarzda namoyon etayotganini yuqori baholadi. Uning ta’kidlashicha, har bir galereya o‘zaro uzviy bog‘langan bo‘lib, tashrif buyuruvchilarga O‘zbekiston va butun mintaqa sivilizatsiyasi tarixini yaxlit holda anglash imkonini beradi.
General Dinesh Kumar bunday dedi:
➖ Bu haqiqatan ham hayratlanarli maskan. Delegatsiyam bilan birgalikda bu yerga kelib, katta taassurotlar oldik. Markazning me’moriy qiyofasi, ekspozitsiyalarning yuksak saviyada tashkil etilgani hamda islomgacha bo‘lgan davrdan tortib bugungi kungacha bo‘lgan tarixning izchil va ta’sirchan tarzda yoritilgani meni chuqur hayratga soldi. Ayniqsa, zamonaviy texnologiyalar yordamida tarixni jonlantirish usuli tahsinga sazovor. Bu yerda har bir ekspozitsiya o‘tmishni nafaqat ko‘rish, balki uni chuqur his qilish imkonini ham beradi.
Bizga namoyish etilgan Usmon Mus'hafi so‘z bilan ta’riflab bo‘lmaydigan darajada noyob meros ekan. Bu men uchun eng ta’sirli eksponat bo‘ldi va uni umrim davomida eslab yuraman.
O‘zbekistonga keladigan har bir sayyoh ushbu maskanni albatta ko‘rishi kerak. Biz Hindistonga qaytgach, do‘stlarimiz va hamkasblarimizga ham bu yerga tashrif buyurishni tavsiya qilamiz.
Tashrif yakunida general Dinesh Kumar O‘zbekistondagi Islom sivilizatsiyasi markazi mamlakatning ko‘p asrlik tarixiy va ma’naviy merosini zamonaviy texnologiyalar bilan uyg‘un holda namoyon etayotgan, xalqaro ahamiyatga ega ilmiy-ma’rifiy maskan ekanini alohida ta’kidladi.
iccu.uz
