Shayxulislom Ollohshukur Poshshozoda Mir Arab madrasasida bo‘ldi
#xabar #Islom_sivilizatsiyasi_forumi #buxoro
Shu yil 11 iyul kuni Kavkaz musulmonlari idorasi raisi, Shayxulislom Ollohshukur Poshshozoda Mir Arab o‘rta maxsus islom ta’lim muassasasiga tashrif buyurdi.
Tashrif davomida mehmon o‘zlari tahsil olgan qutlug‘ ilm dargohida yaratilgan zamonaviy sharoitlar, ta’lim jarayoni hamda keyingi yillarda amalga oshirilgan bunyodkorlik ishlari bilan yaqindan tanishdi. Shuningdek, ustozlar bilan samimiy muloqot qilib, talaba yillariga oid iliq xotiralari bilan o‘rtoqlashdi.
Shayxulislom Ollohshukur Poshshozoda 1968–1973 yillarda Mir Arab madrasasida tahsil olgan bo‘lib, keyinchalik Toshkent Islom institutini tamomlagan. 1979 yildan buyon Kavkaz musulmonlari idorasi raisi sifatida faoliyat yuritib kelmoqda. Shuningdek, u xalqaro diniy tashkilotlar va maslahat kengashlarining faol a’zolaridan biri hisoblanadi.
Tashrif chog‘ida Shayxulislom O‘zbekistonda diniy-ma’rifiy sohada amalga oshirilayotgan keng ko‘lamli islohotlar, tarixiy obidalar va muqaddas qadamjolarni asrab-avaylash, ta’lim muassasalarini rivojlantirish yo‘lidagi sa’y-harakatlarni yuksak baholadi.
U kishi bu yurtda ustozlaridan nafaqat diniy ilm, balki hayot saboqlarini ham olganini alohida ta’kidlab, Mir Arab madrasasi va boshqa muqaddas maskanlarda amalga oshirilgan obodonlashtirish ishlari davlatning din va milliy merosga bo‘lgan yuksak e’tiborining amaliy ifodasi ekanini qayd etdi.
Tashrif yakunida Mir Arab madrasasi jamoasi mehmonga samimiy tashakkur izhor qilib, mazkur uchrashuv ustozlar va talabalar uchun unutilmas ma’naviy-ma’rifiy muloqot bo‘lganini ta’kidladi.
O‘zbekiston musulmonlari idorasi
Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati