Turkiyadagi “The Voice of Travel” jurnalida O‘zbekistondagi turizm va sayyohlik yo‘nalishida amalga oshirilayotgan islohotlarga bag‘ishlangan maqola e’lon qilindi, deb xabar bermoqda “Dunyo” AA.
Turkiya Sayyohlik agentliklari uyushmasi (TÜRSAB) nashrida yoritilgan maqolada yurtimizning boy tarixiy-madaniy merosi, YUNЕSKOning Butunjahon merosi ro‘yxatiga kiritilgan qadimiy shaharlari, milliy urf-odat va an’analari hamda betakror gastronomik imkoniyatlari haqida batafsil ma’lumot berilgan.
Ushbu jurnal Turkiya turizm industriyasi ishtirokchilari, mehmonxonalar va aviakompaniyalar uchun eng muhim axborot manbalaridan biri hisoblanadi.
Nashr bugungi kunda O‘zbekistonda zamonaviy turistik infratuzilma jadal rivojlanayotganiga alohida urg‘u bergan. Xususan, xalqaro aviaqatnovlar tarmog‘ining kengayib borayotgani, mehmonxona va servis xizmatlari sifatining tubdan oshirilayotgani xorijlik, ayniqsa, turk sayyohlari uchun juda katta qulayliklar yaratmoqda.
Mamlakatimizda madaniy va ekoturizm bilan bir qatorda ziyorat turizmi yo‘nalishi alohida o‘rin tutishi qayd etilgan.
Ushbu maqolaning Turkiyaning yetakchi ixtisoslashgan nashrida e’lon qilinishi O‘zbekistonning xalqaro turistik imijini yanada mustahkamlashga xizmat qiladi. Bu esa vatanimizning boy turizm salohiyatini yirik turistik agentliklar o‘rtasida keng targ‘ib qilinishiga zamin yaratib, o‘zaro sayyohlar oqimini sezilarli darajada kengaytiradi.
O‘zbekiston musulmonlari idorasi Matbuot xizmati
Malayziyada o‘tkazilgan V xalqaro ziyorat turizmi konferensiyasi doirasida O‘zbekistonning sayyohlik imkoniyatlari keng targ‘ib etildi, deb xabar bermoqda “Dunyo” AA.
Mamlakatimizning Malayziyadagi elchixonasi mahalliy turkompaniyalar bilan hamkorlikda tashkil etgan taqdimot xorijiy sayyohlik vakillarida katta qiziqish uyg‘otdi.
To‘rt kun davom etgan xalqaro tadbirda 1000 dan ortiq mahalliy va xorijiy turkompaniyalar, mehmonxona va aviakompaniyalar vakillari, soha ekspertlari hamda ommaviy axborot vositalari ishtirok etdi.
Konferensiya doirasida Malayziyaning turizm sohasidagi yetakchi tashkilotlari rahbarlari bilan uchrashuvlar o‘tkazildi. Xususan, Malayziya Islom turizm markazi bosh direktori Mohammad Faizal, “MATTA” sayyohlik kompaniyalari assotsiatsiyasi vitse-prezidenti Mohd Hizzat, “PAPUX” haj va umraga yuboruvchi sayyohlik kompaniyalari assotsiatsiyasi vitse-prezidenti Fathir Adhadad bilan uchrashuvlar bo‘lib o‘tdi.
Suhbat chog‘ida mamlakatimizda turizm sohasida olib borilayotgan keng ko‘lamli islohotlar, ziyorat turizmini rivojlantirish va ziyoratchilar uchun qulay shart-sharoitlar yaratish bo‘yicha amalga oshirilayotgan chora-tadbirlar haqida ma’lumot berildi.
“WITC Mart” ziyorat turizmi yarmarkasi qatnashchilari Buxoro, Samarqand, Xorazm viloyatlari va Toshkent shahridagi islom dunyosiga oid qator ziyoratgohlar faoliyati bilan tanishdi. So‘nggi yillarda viza rejimi soddalashtirilishi natijasida 90 dan ortiq xorijiy davlatlar, jumladan, Malayziya fuqarolari uchun respublikaga vizasiz kirish tartibi amal qilayotganiga alohida urg‘u berildi.
Bugungi kunda Toshkent va Kuala-Lumpur shaharlari o‘rtasida “Uzbekistan Airways” va “Batik Air Malaysia” aviakompaniyalarining to‘g‘ridan to‘g‘ri aviaqatnovlari mavjudligi Markaziy Osiyo va Janubi-Sharqiy Osiyo mintaqalari o‘rtasida sayyohlar oqimini ko‘paytirishga xizmat qilishi ta’kidlandi.
Yarmarkada qatnashgan qator mahalliy turkompaniyalar, xususan, “Nuh Travel & Tours”, “Soka Travel”, “Rayhar Travel”, “Ikhlas Travel” kabi turoperatorlar tomonidan “Ziyorat turizmi”, “Tarixiy-madaniy turizm”, “Umra+”, “Gastronomik turizm”, “Qishki turizm” kabi sayyohlik dasturlari taklif etildi.
O‘zbekiston musulmonlari idorasi Matbuot xizmati