Toshkentga sayohat: tarix, taraqqiyot va taassurotlar
Prezidentimiz tashabbusi bilan amalga oshirilayotgan «O‘zbekiston bo‘ylab sayohat qil!» dasturi ijrosi doirasida viloyat hokimligi apparati xodimlari uchun Toshkent shahriga ikki kunlik ma’rifiy sayohat tashkil etildi, xabar bermoqda "Zarafshon" nashri.
Sayohat ishtirokchilari dastlab mamlakatimizning ilmiy va ma’naviy salohiyatini o‘zida mujassam etgan O‘zbekistondagi Islom sivilizatsiyasi markazida bo‘lishdi. Ular bu yerda amalga oshirilgan keng ko‘lamli bunyodkorlik ishlari, buyuk ajdodlarimiz qoldirgan boy ilmiy-ma’naviy merosni asrab-avaylash va keng targ‘ib etishga qaratilgan ishlar bilan yaqindan tanishdi.
Shundan so‘ng sayohat dasturi poytaxtning ramziy maskanlari — Mustaqillik maydoni va «Yangi O‘zbekiston» bog‘ida davom etdi. Shuningdek, ishtirokchilar Toshkent shahridagi teatrlar va muzeylarga borib, mamlakatimizda madaniyat va san’at sohasida amalga oshirilayotgan yangilanishlar bilan tanishish imkoniga ega bo‘lishdi.
- Bunday sayohatlar davlat xizmatchilari uchun nafaqat mazmunli hordiq, balki katta ma’naviy ozuqa hamdir, - deydi viloyat hokimining maslahatchisi Sherali Temirov. - Ayniqsa, Islom sivilizatsiyasi markazida yaratilgan sharoitlar, boy tarixiy merosimiz va poytaxtimizda amalga oshirilayotgan ulkan bunyodkorlik ishlari barchamizda chuqur taassurot qoldirdi. Bu kabi safarlar jamoadagi hamjihatlikni mustahkamlash, yangi g‘oya va tashabbuslar bilan qaytish hamda ish faoliyatiga yanada katta ishtiyoq bilan kirishishga xizmat qiladi.
O‘zbekiston musulmonlari idorasi Matbuot xizmati
Diniy ta’limda yangi bosqich: Toshkentda nufuzli anjuman bo‘lib o‘tmoqda
Toshkent shahridagi Islom sivilizatsiyasi markazining Katta majlislar zalida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani boshlandi.
O‘zbekiston musulmonlari idorasi tarixida ilk bor o‘tkazilayotgan ushbu nufuzli tadbirda Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Islom sivilizatsiyasi markazi direktori Firdavs Abduxoliqov, shuningdek, diniy ta’lim muassasalari rahbarlari, bosh imom-xatiblar va OAV vakillari ishtirok etmoqda. Anjumanga jami 700 nafarga yaqin pedagog va soha vakillari jalb etilgan bo‘lib, ularning 300 nafari bevosita zalda, 400 nafari esa hududlardan videoselektor orqali qatnashmoqda.
So‘zga chiqqan notiqlar so‘nggi yillarda Prezidentimiz tashabbuslari bilan diniy-ma’rifiy sohani takomillashtirish va zamonaviy kadrlar tayyorlash borasida amalga oshirilayotgan tizimli islohotlarga to‘xtalib o‘tmoqda. Ta’kidlanganidek, Mir Arab oliy madrasasi, Hadis ilmi maktabi, Imom Termiziy islom instituti va madrasasi hamda 4 ta xalqaro ilmiy-tadqiqot markazining tashkil etilishi ilm ahliga keng imkoniyatlar eshigini ochdi. Toshkent islom institutida magistratura ochildi, tizimdagi 510 nafar pedagogning 50 nafardan ortig‘i PhD va DSc ilmiy darajalariga ega bo‘ldi.
Shuningdek, yurtimizdagi diniy ta’lim muassasalariga Misrning Al-Azhar majmuasi ustozlari jalb etildi. 90 ta fan dasturi va yangi avlod darsliklari yaratildi. Mir Arab, Xadichai Kubro, Hidoya va Ko‘kaldosh madrasalari zamonaviy binolarga ega bo‘lib, Iordaniya, Misr va Birlashgan Arab Amirliklarining yetakchi oliy ta’lim muassasalari bilan hamkorliklar rivojlanmoqda.
Ushbu nufuzli anjumandan ko‘zlangan maqsad ham professor-o‘qituvchilar uchun ilmiy-amaliy muloqot maydonini yaratish, pedagoglarning kasbiy salohiyatini yuksaltirish, ta’lim jarayoniga raqamli va innovatsion usullarni keng joriy etishdir.
O‘zbekiston musulmonlari idorasi Matbuot xizmati