Ugandalik yoshlar Turkiyaga o'n ming dollar xayriya qildi
Turkiya jumhuriyati bir necha yillardan buyon Afrikadagi musulmon mamlakatlarida maktablar bunyod etib, bolalarning ta'lim olishiga ko'maklashib kelayotgan edi. Yaqinda Turkiyada sodir bo'lgan kuchli zilzila ugandalik maktab o'quvchilarini ham tashvishlantirdi va ular minnatdorlik sifatida xayriya tadbirlarini tashkil etdi.
Boshlang'ich maktabi direktori Bulyanku Jamil Vambining aytishicha, maktab o'quvchilari tanaffusda tamaddi qilish uchun mo'ljallangan pullarini ixlos bilan xayriya qilishgan.
O'quvchilar to'plagan mablag'larning umumiy miqdori 10 ming dollardan oshdi, deya xabar beradi Anadolu agentligi.
O'zbekiston musulmonlari idorasi Matbuot xizmati
Diniy ta’lim sohasida ilk bor Respublika anjumani bo‘lib o‘tadi
Joriy yilning 19-20 avgust kunlari O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani Islom sivilizatsiyasi markazida bo‘lib o‘tadi.
Davlatimiz Rahbari tomonidan har jabhada olib borilayotgan yangilanish va islohotlarga hamohang tarzda Diniy idora tarixida ilk bor o‘tkazilayotgan ushbu tadbirda jami 700 nafar pedagog va soha mutaxassisi, jumladan, 300 nafar ishtirokchi bevosita anjuman zalida, 400 nafar ishtirokchi esa hududlardan videoselektor orqali qatnashadi.
Anjumandan ko‘zlangan maqsad sohadagi istiqbolli rejalarni muhokama qilish, diniy ta’limda pedagogik va kasbiy mahoratni oshirish, ta’lim jarayoniga zamonaviy texnologiyalarni yanada keng tatbiq etish hamda diniy ta’limni yangi bosqichga olib chiqishdir.
Dastur doirasida soha rahbarlari ishtirokida tahliliy ma’ruzalar, taniqli professorlar tomonidan mahorat darslari, ilmiy-metodik mashg‘ulotlar bo‘lib o‘tadi. Shuningdek, ishtirokchilar O‘zbekiston musulmonlari idorasi, Islom sivilizatsiyasi markazi bilan yaqindan tanishib, Hazrati Imom majmuasidagi tarixiy qadamjo va obidalarni ziyorat qilishadi.
O‘zbekiston musulmonlari idorasi Matbuot xizmati
