Kelinim homiladorligining uchinchi oylarida shifokor tavsiyasi bilan ul'tra tovush  tashxisini qildirdik. Shifokor homilani tekshirib, sog'lom, yuragi yaxshi urayotganini aytdi. “Tabriklayman, nevarangiz qiz ekan”, deb, qog'ozga yoza boshladi. Qizmi, o'g'ilmi Allohning ne'mati, ko'rsatganiga shukr.

Biror oy o'tib, kelinim ko'chadan gap topib keldi. “Oyijon uyga qaytayotsam, ko'cha boshidagi qo'shni ayol: “Mening ko'zimga ko'rinadi, kelinposhsha, qiz ko'rasiz” deb, oy kunigacha aytib berdilar.

Hayron bo'lib qoldim. Bir soatdan keyin nima bo'lishini bilmaymiz. Ular bo'lsa  oy kunigacha aytishga jur'at qilishadi. Hattoki Payg'ambarimiz  sollallohu alayhi vasallam ham g'ayb ilmidan bexabar bo'lganlar.

Oysha onamiz (roziyallohu anho) bunday deganlar: “Kim Rasululloh (sollallohu alayhi vasallam) ertaga nima bo'lishini aytadilar, deb o'ylasa, Alloh taologa katta bo'hton qiladi. Alloh taolo bunday marhamat qilgan:“Ayting: “Osmonlar va erdagi birorta g'aybni bilmaydi. Faqat Alloh biladi” (Naml, 65. Imom Muslim rivoyati).

Alloh taolo Qur'oni karimning A'rof surasida marhamat qiladi:

“Sen: “O'zim uchun Alloh xohlaganidan tashqari, na foyda va na zararga molik emasman. Agar g'aybni bilganimda, yaxshilikni ko'paytirib olgan bo'lar edim va menga yomonlik etmas edi ...” deb ayt” (188-oyat).

Ibn Umar (roziyallohu anhu) rivoyat qiladi: Payg'ambarimiz (sollallohu alayhi vasallam) aytdilar: “G'ayb ilmlari beshtadir, ularni Alloh taolodan o'zga bilmaydi. Bachadonlar qachon tashlashini, ertaga nima bo'lishini, qachon yomg'ir yog'ishini, har bir tirik jon qayerda o'lishini va qiyomat qachon qoim bo'lishini Alloh taolodan o'zga bilmaydi” (Imom Buxoriy rivoyati).

O'zbekiston musulmonlari idorasi mutaxassisi

Munira ABUBAKIROVA