To'shagingizda chalqancha yotib, o'zingizdan so'rang: hayotda qanday qilib muvaffaqiyatga erishsam bo'larkin?

Shu on javobni xonangiz ichidan topasiz!

Honaning shifti sizga aytadiki: Marra baland, unga tomon yurar ekansan belingni mahkam bog'la!

Ko'cha tarafga o'rnatilgan deraza der: Atrofingdagi olamga boq, ko'pchilik odamlar avval yutqazib keyin yutadilar.

Devorga ilingan soat aytadi: Har soniya oltinga teng, uni yaxshi ishlar bilan, Allohning toatida o'tkaz!

Ko'zgu aytadi: Odamlar senga qanday munosabatda bo'lishlarini, senga qay holatda ko'rinishlarini xohlasang, sen ham ularga shunday ko'rin!

Shkafga osilgan kalendar aytadi: bugungi ishni ertaga qo'yma, chunki ertaning o'z ishlari bor.

Eshik der: maqsadingga erishish uchun kuch-quvvat bilan, oqillik bilan harakat qil.

Yerni ham unutib qo'ymang, u sizni qayta-qayta sajda qilishga, Parvardigoringizga yaqinlashtirishga da'vat etadi!

Odam o'ziga ishonishi – g'alaba yo'lidir. Muvaffaqiyat esa o'ziga ishonchni mustahkamlaydi. Ya'ni o'ziga ishonib ish ko'rgan odam, ishida yutib chiqsa, o'ziga bo'lgan ishonchi yanada ortadi. Biror yangilik qilib ko'rishdan qo'rqish – to'g'ri yutqazishga olib boradigan yo'ldir!

Ko'pincha qo'rqqaningiz boshingizga keladi. Biror ishga kirishib, uni uddaburonlik bilan amalga oshirishni istasangiz, shashtingizni tushurmoqchi bo'lganlarning gapidan quloq yuming, eshitmang ularning gapini!

Bitta tog' burguti bor ekan, uyasini tog'dagi biror daraxtning uchiga qurarkan. Burgutning uyasi odatda to'rtta tuxumga moslangan hajmda bo'ladi. Bir kuni o'sha tuxumlrdan biri burgut uyasidan tushib, pastga yumalab-yumalab, tovuqning iniga joylashib qolibdi. Ma'lumki, tovuqlar tuxumdan jo'ja ochib chiqquncha tuxumlarga yaxshilab qaraydi, issiqina bosib o'tiradi. Vaqti kelib tuxumlar ochib chiqqanda ulardan biridan kichkina burgut polaponi ochib chiqibdi. Lekin bu burgut tovuqcha tarbiya ko'ribdi!

Bir kuni u tovuqning inida o'ynab yursa, osamondan uchib o'tayotgan burgutlar galasi pastda bir burgut polaponi ularga o'xshab uchishga urinayotganini ko'rib qolishibdi. Lekin atrofidagi tovuqlar: “Sen oddiy tovuqsan xolos, burgutlardek yuqoriga parvoz etolmaysan!” deb uning ustidan kulishibdi.

Shundan keyin polapon umidsizlikka tushib, harakatlarini butunlay to'xtatib qo'yibdi va uzoq vaqt tovuqlarcha hayot kechirgach joni uzilibdi.

Demak, bundan xulosa chiqadiki, ayni vaqtdagi salbiy holatingizga tayanib qolsangiz, o'zingiz ishongan narsaning asiriga aylanasiz.

Agar burgut bo'lsangiz va g'alaba osmonida balandlab parvoz etay desangiz, orzularingiz ro'yosi tomon intiling hamda maqsadingizni qo'llab-quvvatlaydiganlar bilan do'st bo'ling!

Tovuqlarning gapiga quloq solmang!

Doktor Hasson Shamsi Poshoning "Metin qoyalar" kitobidan

G'iyosiddin Habibulloh, Ne'matulloh Isomov tarjimasi.