Bemazhablik fitnadir
Muayyan mazhablarga ergashishning go'yoki musulmonlar yaxlitligini buzuvchi amal sifatida tanqid qilinishi. Islom olamidagi etakchi fiqhiy ulamolar hozirgi kunda to'rtta sunniy mazhab asoschilari kabi shar'iy dalillardan hukm chiqara oladigan mujtahid imomlar yo'qligi sababli musulmonlar ushbu imomlardan biriga, ya'ni o'z yurtida keng tarqalgan mazhabga ergashishlari lozimligini aytishadi. Buning sababi shuki, diniy masalalarda etarli bilimlarga ega bo'lmagan odam Qur'on va hadislardan mustaqil shar'iy hukm chiqara olmaydi. Mazhablarda esa shar'iy masalalar islom ta'limoti, xalqning urf-odatlari, qadriyatlari, milliy xususiyatlaridan kelib chiqib, eng mos ko'rinishda hal qilinadi.
Ekstremistik guruhlar “kimki o'zini biror-bir qavmga o'xshatsa, u o'shalardan” degan hadisni musulmonlarga ahli kitob (yahudiy va nasroniy vakillari) bilan aloqa qilish, ular kiygan kiyim (kostyum-shim, kepka va h.k.)larni kiyish man etilgan, degan ma'noda buzib talqin qiladi. Aslida hadis aqidaviy mazmunga ega bo'lib, unda imon asoslaridan chetga chiqmaslik nazarda tutilgan. Payg'ambar sollallohu alayhi vasallam boshqa din vakillari bilan shaxsan yaxshi aloqada va muomalada bo'lganliklari. Jumladan, ularga hadyalar berib, ular qilgan hadyalarni qabul qilganlar. Boshqa din vakillari tomonidan hadya qilingan kiyimlarni kiyganlar. Bundan ekstremistlar o'z g'oya va faoliyatini asoslash maqsadida Islom manbalaridan iqtiboslar olib, etarli ilm va tajribaga ega bo'lmagan izdoshlarini mutaassibona tarbiyalashda foydalanganligini xulosa qilish mumkin.
Yangiqo'rg'on tumani "Shoxo'jaboy" jome masjidi imom xatibi Toxirjon Boltaboyev
Islom Karimov xotirasiga ehtirom ko‘rsatildi
2 sentyabr kuni Toshkent shahrida O‘zbekiston Respublikasining Birinchi Prezidenti Islom Karimovni xotirlash marosimi bo‘lib o‘tdi.
Prezident Shavkat Mirziyoyev Islom Karimov nomidagi ilmiy-ma’rifiy yodgorlik majmuasiga tashrif buyurib, Birinchi Prezidentimiz haykali poyiga gulchambar qo‘ydi.
Islom Karimov mamlakatimiz tarixining g‘oyat murakkab va mas’uliyatli davrida O‘zbekistonga rahbarlik qildi. Uning nomi mustaqillikning qo‘lga kiritilishi, milliy davlatchiligimizning tiklanishi va yurtimizning mustaqil taraqqiyot yo‘liga chiqishi bilan uzviy bog‘liq.
Mustaqillik, eng avvalo, bizga shonu sharafimiz, muqaddas dinimiz, ona tilimiz, unutilayotgan milliy qadriyatlarimizni qaytarib berdi.
Istiqlol tufayli biz o‘zligimizni angladik, nomi hamisha e’zozda bo‘lgan ota-bobolarimizning munosib vorislari ekanimizni butun dunyoga namoyon etdik.
Shu ma’noda, mustaqilligimizning poydevorini yaratishga, mamlakatimiz tinchligi va barqarorligini ta’minlashga, xalqimiz farovonligi yo‘lida xizmat qilishga katta hissa qo‘shgan insonlar xotirasini e’zozlash muhim ma’naviy qadriyatdir.
Prezident Shavkat Mirziyoyevning e’tibori bilan Birinchi Prezidentimizning xotirasini abadiylashtirish bo‘yicha keng ko‘lamli ishlar amalga oshirildi. Toshkentda Islom Karimov nomidagi ilmiy-ma’rifiy yodgorlik majmuasi tashkil etildi.
Samarqandga tashriflar chog‘ida uning maqbarasini ziyorat qilish ezgu an’anaga aylandi.
Marosimda Qur’on tilovat qilinib, duo o‘qildi. Islom Karimovning mamlakatimiz mustaqilligi, tinchlik va barqarorlikni ta’minlash, xalq farovonligini yuksaltirish yo‘lidagi xizmatlari yodga olindi.
Oliy Majlis palatalari, Prezident Administratsiyasi, Vazirlar Mahkamasi, vazirlik va idoralar vakillari, ziyolilar va Toshkent shahri jamoatchiligi ham Birinchi Prezidentimiz haykali poyiga gullar qo‘ydi.
Xotira tadbirlari Samarqand va Qarshi shaharlarida ham bo‘lib o‘tdi.
