Dinni notayin kishilardan o'rganish ulkan falokat
Hozirgi kunda ba'zilar farzandlarini o'qitish uchun chet ellarga olib borib, ularni o'zga yurtlarda qarovsiz holda tashlab kelmokdalar. Natijada, farzandlari ilm olishning o'rniga befoyda ishlar, kimligi noma'lum kishilar bilan qimmatli vaqtini behuda sarflamokda. Shuni unutmaslik kerakki, farzand barkamol va el-yurtga xizmat qilishi uchun uning ustozi, avvalo, to'g'ri yo'l da va e'tikodda adashmagan bo'lishi hamda soha mutaxassislari tomonidan e'tirof kilingan shaxs bo'lishi katta ahamiyat kasb etadi.
Agar ustozning o'zi tarbiya va nasihatga muxtoj bo'lsa, undan ta'lim olgan shogirddan yaxshi natija chiqishi juda qiyin. Sir emaski, hozirgi kunda to'g'ri yo'ldan adashgan ustozlardan ta'lim olgan farzandlar, o'z ota-onalarini xurmat qilmasdan: "Ota-onam faqat meni dunyoga kelishimga sabab bo'lgan xolos" deyayotgan bo'lsa, ba'zilari ota-onasini imonsizlikda ayblamoqda. Ba'zilari tug'ilib o'sgan yurtiga qarshi chiqib, bir qancha muammolarga sabab bo'lmokdalar.
Yoshlarimiz ijtimoiy tarmoqlardan foydalanib, bilimlarini oshirishmoqchi bo'lishsa, rasmiy saytlarga murojaat qilishsin, rasmiy masjidlar va imom-domlalarimizning kanallariga a'zo bo'lishsin. Zero, ijtimoiy tarmoqlarda g'arazli maqsadlar bilan faoliyat olib boradigan sayt, kanal va shaxslar juda ko'p. Ular jamiyatimiz va yoshlarimiz tarbiyasiga katta tahdid bulib, firqalanish, dinda g'uluvga ketish va mazhabsizlik urug'larini sochmoqdalar.
Aytish joizki, bugungi kunda yoshlar tarbiyasi va kamoloti maqsadida yurtimizda keng ko'lamli ishlar amalga oshirilayotganiga o'zingiz guvoh bo'lmoqdasiz. Yoshlar orasida kitobxonlikni oshirish uchun joylar da yangi kutubxonalar tashkil etilayotgani, musobaqa lar o'tkazilayotgani, ularning bo'sh vaqtini mazmunli tashkil etish uchun joylarda to'garaklar, texnoparklar ochilayotgani, yosh olimlar uchun berilayotgan turli imtiyozlar shular jumlasidandir. Zero, imon-e'tikodi mustahkam, ilm-ma'rifatli, jismonan sog'lom yoshlar yurtning buyuk kelajagi garovidir.
Hulosa shuki, yoshlarning odob-axloqi, ta'lim-tarbiyasi, ilm-ma'rifati bilan har bir ota-ona va mas'ullar shug'ullansa, kelajakda bizning farzand larimizdan ham Imom Buxoriy, Imom Moturidiy, Horazmiy, Ibn Sino, Farg'oniy, Alisher Navoiy kabi buyuk olimu allomalar chiqadi, inshaAlloh.
Sufiyev Ja'farxon To'raqo'rg'on tuman "Ishoqxon to'ra" jome masjidi imom xatibi
Ilmiy-amaliy anjuman doirasida bir guruh ustoz va xodimlar munosib taqdirlandi
O‘zbekiston musulmonlari idorasi tomonidan tashkil etilgan «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani doirasida sohada alohida o‘rnak ko‘rsatgan ustozlarni taqdirlash marosimi bo‘lib o‘tdi.
Anjumanda Davlatimiz Rahbari tashabbuslari bilan har jabhada amalga oshirilayotgan islohotlar qatorida ilm-fanni taraqqiy ettirish, ajdodlar merosini o‘rganish, diniy ta’limni rivojlantirish va sohaga ko‘rsatilayotgan yuksak e’tibordan mamnunlik kayfiyati hukm surdi.
Diniy idora tasarrufidagi oliy va o‘rta maxsus diniy ta’lim muassasalarida samarali faoliyat yuritib, yoshlarga ta’lim-tarbiya berish, soha rivojiga munosib hissa qo‘shish hamda dinimizning sofligini asrash yo‘lida fidokorona mehnat qilayotgan bir guruh pedagog va mudarrislar mehnati munosib e’tirof etildi.
Tadbir davomida sohadagi fidokorona va samarali mehnatlari uchun quyidagi ustoz va pedagoglar Faxriy yorliq hamda Umra yo‘llanmalari bilan mukofotlandi:
- Rahmatulla Umarov — Sayyid Muhyiddin maxdum o‘rta maxsus islom ta’lim muassasasi o‘qituvchisi.
- Maxtumquli Toshqulov — Xoja Buxoriy o‘rta maxsus islom ta’lim muassasasi o‘qituvchisi.
- Azimxon Abdullayev — Hidoya o‘rta maxsus islom ta’lim muassasasi o‘qituvchisi.
- Abdulbosit Rahimov — Mir Arab o‘rta maxsus islom ta’lim muassasasi o‘qituvchisi.
Shuningdek, anjuman doirasida diniy ta’lim tizimida namunali rahbarlik qilgan, fidokorona pedagogik va ilmiy-faoliyat olib borgan,ta’lim muassasalarining moddiy-texnik bazasini mustahkamlash, to‘garaklarni samarali tashkil etishdagi alohida xizmatlari uchun yana 15 nafar rahbar va o‘qituvchilar O‘zbekiston musulmonlari idorasining Faxriy yorliqlari hamda esdalik sovg‘alari — televizor, noutbuk va planshetlar bilan taqdirlandi.
O‘zbekiston musulmonlari idorasi jamoasi taqdirlangan barcha ustoz va xodimlarni ushbu yuksak e’tirof bilan samimiy muborakbod etib, ularning kelgusi ilmiy va pedagogik faoliyatlarida ulkan zafarlar tilaydi.
O‘zbekiston musulmonlari idorasi Matbuot xizmati
