Marokash podshohligining Rabot shahrida Ta'lim, fan va madaniyat masalalari bo'yicha Islom tashkiloti (ICESCO)ning xalqaro konferentsiyasi bo'lib o'tmoqda.
Mazkur nufuzli anjumanda O'zbekiston xalqaro islom akademiyasi rektori Muzaffar Komilov ham ishtirok etmoqda, deya xabar berdia Akademiya Axborot xizmati. Konferentsiya “Musulmon dunyosida taraqqiyotning strategik indikatorlari: Bilim indikatori model sifatida” mavzusidagi 1-maslahatlashuv uchrashuvi bilan o'z ishini boshladi.

Ochilish sessiyasida ICESCO Bosh direktori Salim al-Malikning murojaati tinglandi. O'z navbatida Muhammad al-Maktum fondi ijrochi direktori, professor Jamal bin Huvayreb, hamda UNDP bosh texnik maslahatchisi va bilim loyihasi direktori Hani Turki anjuman ishtirokchilariga murojaat yo'ladi.

Shundan so'ng “Bilim jamiyatlarini qurish va baholashni muhokama etishning eng muhim muammolari bo'yicha” sessiyasi o'tkazildi.
Rasmiy tadbirlardan so'ng Payg'ambarimiz sallallohu alayhi vasallamning siyrati va islom tsivilizatsiyasi xalqaro ko'rgazmasi va muzeyiga tashrif tashkil etildi.
Ta'kidlash joizki, tashkilot 1979-yilda tashkil topgan bo'lib, bosh qarorgohi Marokash davlati poytaxti Rabot shahrida joylashgan. Tashkilot tomonidan a'zo davlatlar o'rtasida ta'lim, fan, madaniyat va kommunikatsiya sohalarida hamkorlikni mustahkamlash, xalqlar hamda dinlar o'rtasida do'stona munosabatlarni o'rnatishga muhim e'tibor qaratib kelinmoqda. Islom olami va dunyo tamadduni rivojida O'zbekiston Respublikasining o'rni beqiyos bo'lgani bois ICESCO tashkiloti bilan o'zaro hamkorlik aloqalari rivojlanib bormoqda.

O'zbekiston musulmonlari idorasi matbuot xizmati