Ma'rifat o'rnini jaholat aslo egallay olmaydi
So'nggi yillarda yurtimizda xayrli bir an'ana shakllandi. Muhtaram Prezidentimiz Shavkat Mirziyoev har yili yil so'ngida Oliy Majlisga va O'zbekiston xalqiga murojaat qilib, mamlakatimizda amalga oshirilayotgan ulkan islohotlar va ularning natijalari, yo'l qo'yilayotgan kamchiliklar va ularni bartaraf etish yo'llari va choralari haqida kuyinib gapirmoqdalar.
Shu bilan bilan, kelgusida amalga oshirilishi rejalashtirilayotgan ishlar haqida ham to'xtalib, har bir ishni puxta bajarish zarurligini ta'kidlamoqdalar.
Bugun muhtaram Yurtboshimiz Oliy Majlisga va O'zbekiston xalqiga Murojaatnomasida bunday dedilar: «Butun dunyoda kuchayib borayotgan radikalizm, ekstremizm, terrorizm, odam savdosi, giyohvandlik kabi xatarlar, afsuski, bizni ham chetlab o'tmayapti.
Lekin, takror aytaman, musulmon ummatiga saboq bergan Imom Buxoriy, Imom Termiziy, Imom Moturidiy kabi buyuk ulamolar etishib chiqqan bizning diyorimizda bu borada adashganlar, radikalizm va ekstremizm g'oyalariga berilganlar bo'lishi mumkinmi?
Biz jamiyatimizda har qanday radikallashuvga, yoshlarimiz ongini buzg'unchi yot g'oyalar bilan zaharlashga, dindan siyosiy maqsadlarda foydalanishga, ma'rifat o'rnini jaholat egallashiga yo'l qo'ymaymiz».
Darhaqiqat, bugun O'zbekistonning har bir fuqarosi, kim o'lishidan qat'i nazar, yanada hushyorroq va sergakroq bo'lishi shart. Chunonchi, hozirgi vaqtda dunyoning bir chekkasida sodir bo'layotgan voqea-hodislarning ijobiy natijalari yoki salbiy oqibatlari zum o'tmay yurtimizda ham bo'y ko'rsatmoqda.
Bunday holat kishiga Rasuli akram sollallohu alayhi va sallamning quyidagi muborak hadislariga qat'iy rioya etishni eslatadi: «Har biringiz mutasaddisiz, har biringiz qo'l ostingizdagilar uchun mas'ulsiz. Har bir rahbar insonlar ustidan mutasaddidir va ular uchun mas'uldir. Er o'z ahli ayoli va qo'l ostidagilar ustidan mutasaddidir va ular uchun mas'uldir. Hotin erining uyida mutasaddidir va qo'l ostidagilar uchun mas'uldir»(Imom Buxoriy rivoyati).
Bugun O'zbekiton har bir fuqarosining nigohi oynai jahonga qadaldi. Davlatimiz Rahbarining Murojaatnomasini barchamiz jon qulog'imiz bilan eshitdik. Bu Murojaatnoma yurtimizning keyingi yillardagi taraqqiyot strategiyasini belgilab beruvchi muhim kontseptual asos bo'ladi.
Darvoqe, biz tarixdan saboq chiqarib yashashga odatlangan xalqmiz. Shunday ekan, Preidentimiz ta'kidlaganlaridek, biz jamiyatimizda har qanday radikallashuvga, yoshlarimiz ongini buzg'unchi yot g'oyalar bilan zaharlashga, dindan siyosiy maqsadlarda foydalanishga, ma'rifat o'rnini jaholat egallashiga yo'l qo'ymasligimiz shart.
Jasurbek domla RAUPOV,
Toshkent viloyati bosh imom-xatibi
Diniy ta’limda yangi bosqich: Toshkentda nufuzli anjuman bo‘lib o‘tmoqda
Toshkent shahridagi Islom sivilizatsiyasi markazining Katta majlislar zalida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani boshlandi.
O‘zbekiston musulmonlari idorasi tarixida ilk bor o‘tkazilayotgan ushbu nufuzli tadbirda Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Islom sivilizatsiyasi markazi direktori Firdavs Abduxoliqov, shuningdek, diniy ta’lim muassasalari rahbarlari, bosh imom-xatiblar va OAV vakillari ishtirok etmoqda. Anjumanga jami 700 nafarga yaqin pedagog va soha vakillari jalb etilgan bo‘lib, ularning 300 nafari bevosita zalda, 400 nafari esa hududlardan videoselektor orqali qatnashmoqda.
So‘zga chiqqan notiqlar so‘nggi yillarda Prezidentimiz tashabbuslari bilan diniy-ma’rifiy sohani takomillashtirish va zamonaviy kadrlar tayyorlash borasida amalga oshirilayotgan tizimli islohotlarga to‘xtalib o‘tmoqda. Ta’kidlanganidek, Mir Arab oliy madrasasi, Hadis ilmi maktabi, Imom Termiziy islom instituti va madrasasi hamda 4 ta xalqaro ilmiy-tadqiqot markazining tashkil etilishi ilm ahliga keng imkoniyatlar eshigini ochdi. Toshkent islom institutida magistratura ochildi, tizimdagi 510 nafar pedagogning 50 nafardan ortig‘i PhD va DSc ilmiy darajalariga ega bo‘ldi.
Shuningdek, yurtimizdagi diniy ta’lim muassasalariga Misrning Al-Azhar majmuasi ustozlari jalb etildi. 90 ta fan dasturi va yangi avlod darsliklari yaratildi. Mir Arab, Xadichai Kubro, Hidoya va Ko‘kaldosh madrasalari zamonaviy binolarga ega bo‘lib, Iordaniya, Misr va Birlashgan Arab Amirliklarining yetakchi oliy ta’lim muassasalari bilan hamkorliklar rivojlanmoqda.
Ushbu nufuzli anjumandan ko‘zlangan maqsad ham professor-o‘qituvchilar uchun ilmiy-amaliy muloqot maydonini yaratish, pedagoglarning kasbiy salohiyatini yuksaltirish, ta’lim jarayoniga raqamli va innovatsion usullarni keng joriy etishdir.
O‘zbekiston musulmonlari idorasi Matbuot xizmati
