“Guruhdosh-kanaldosh” do'stlardan ogoh bo'ling!
Toshkent islom institutida yoshlarning mafkuraviy immunitetini yanada oshirish, turli oqimlarning yot g'oyalari ta'siriga tushib qolishini oldini olishga qaratilgan tadbirlar doirasida Ichki ishlar vazirligi terrorizm va ekstermizmga qarshi kurashish bosh boshqarmasi mas'ul xodimi Abdumalik Karimov “Ekstremistik va terrorchi tashkilotlarning butunjahon internet tarmog'idagi targ'ibot va yollash faoliyatining xususiyatlari” mavzusida ma'ruza bilan ishtirok etdi.
Tadbirni TII Yoshlar masalalari va ma'naviy-ma'rifiy ishlar bo'yicha prorektor Umidjon Hodjayev kirish so'zi bilan ochib berdi.
Bugungi kunda ekstremizm va terrorizm masalasi dunyodagi eng global muammoga aylanib bormoqda. Ularning amalga oshirayotgan xunrezlik va qabih ishlarini butun insoniyat qattiq qoralamoqda. Yanada qabihroq tomoni shundaki, ular qilayotgan ishlarini din niqobi ostida, muqaddas islom dinini asl mohiyatlarini buzgan holatda amalga oshirmoqda. Ular o'z targ'ibotlarini kengaytirish uchun ommaviy axborot vositalari, zamonaviy texnologiyalar, internet kabi global tarmoqlardan maksimal darajada foydalanayotganligi kishini o'yga toldiradi. Chunki, hozirgi kunda internet tarmog'i insonlar, ayniqsa, yoshlar hayotining asosiy qismiga aylanib ulgurgan. Shu va boshqa jihatlarni e'tiborga olib, bu global muammoga qarshi ma'naviy-ma'rifiy kurash bilan bir qatorda uning huquqiy asoslarini ishlab chiqishni talab qiladi. Bundan maqsad fuqarolarimizning bunday nobakorlar safiga bilib-bilmay qo'shilib qolishning oldini olishdan iboratdir.
Real hayotimizdagidan ko'ra, virtual hayotda ko'proq odamlar bilan do'st tutinamiz. Ularning aslida kimligi, do'stlik taklif qilishdan maqsadi neligi bilan esa qiziqish hayolimizga ham kelmaydi. Bu esa bizning eng katta kamchiliklarimizdan biridir. Qarang, salafi solihlarimiz kim bilan do'st bo'lish haqida muayyan dastur tuzib qo'ygan ekanlar.
Alqama ibn Labid rahmatullohi alayh o'g'liga nasihat qilib dedi:
“Ey o'g'lim! Vaqtiki kelib do'st tutishga ehtiyoj sezganingda, to'g'ri kelgan odam bilan do'st tutinib ketavermagin! Balki, do'sting senga ma'naviy ziynat beruvchi fozil bo'lsin! Yengiltaklik qilganingda seni tartibga soluvchi nosih bo'lsin! Boshingga musibat tushganda senga dalda bo'luvchi mard bo'lsin! Haq gapni aytganingda seni tasdiqlab, qo'llaguvchi sodiq bo'lsin! Yordamiga muhtoj bo'lganingda yordamini ayamaydigan sahiy bo'lsin! Unga do'stona qo'l cho'zganingda u ham senga qo'l cho'zuvchi samimiy bo'lsin! Sening yaxshi ishlaringga munosib baho beruvchi odil bo'lsin! Kamchiliklaringni yashiruvchi oliyjanob bo'lsin! Uning ortidan senga kulfat kelmaydigan bo'lsin! U tufayli hayoting ostin-ustin bo'lib ketmaydigan bo'lsin! Omma oldida seni xo'rlamaydigan bo'lsin!”
Bu nasihat o'z davri odamlariga nisbatan bugungi zamon odamlari uchun zarurroq, desak to'g'ri bo'ladi. Chunki ilgargi odamlarning minglab-minglab do'stlari, guruhdoshlari, kanaldoshlari bo'lmagan. Ular o'z mahallasi, nari borsa qo'shni mahalladagi tanishlari bilangina do'stlik rishtasini bog'lay olganlar xolos. Biz esa bugun uyda o'tirib, sayyoramizning narigi nuqtasidagi odamga o'z sirlarimizni ochyapmiz, dardimizni aytib holimizdan shikoyatlar qilyapmiz. Salafi solihlar o'gitlariga ko'ra, ijtimoiy tarmoqlardagi «do'stlarimiz»ning kimligi bilan jidiy qiziqib qo'ysak, sirlarimiz ayniqsa, shaxsiy ma'lumotlarimizni kimlar bilan bo'lishayotganimizga ahamiyat bersak foydadan holi bo'lmas ekan!
TII Matbuot xizmati
Diniy ta’limda yangi bosqich: Toshkentda nufuzli anjuman bo‘lib o‘tmoqda
Toshkent shahridagi Islom sivilizatsiyasi markazining Katta majlislar zalida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani boshlandi.
O‘zbekiston musulmonlari idorasi tarixida ilk bor o‘tkazilayotgan ushbu nufuzli tadbirda Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Islom sivilizatsiyasi markazi direktori Firdavs Abduxoliqov, shuningdek, diniy ta’lim muassasalari rahbarlari, bosh imom-xatiblar va OAV vakillari ishtirok etmoqda. Anjumanga jami 700 nafarga yaqin pedagog va soha vakillari jalb etilgan bo‘lib, ularning 300 nafari bevosita zalda, 400 nafari esa hududlardan videoselektor orqali qatnashmoqda.
So‘zga chiqqan notiqlar so‘nggi yillarda Prezidentimiz tashabbuslari bilan diniy-ma’rifiy sohani takomillashtirish va zamonaviy kadrlar tayyorlash borasida amalga oshirilayotgan tizimli islohotlarga to‘xtalib o‘tmoqda. Ta’kidlanganidek, Mir Arab oliy madrasasi, Hadis ilmi maktabi, Imom Termiziy islom instituti va madrasasi hamda 4 ta xalqaro ilmiy-tadqiqot markazining tashkil etilishi ilm ahliga keng imkoniyatlar eshigini ochdi. Toshkent islom institutida magistratura ochildi, tizimdagi 510 nafar pedagogning 50 nafardan ortig‘i PhD va DSc ilmiy darajalariga ega bo‘ldi.
Shuningdek, yurtimizdagi diniy ta’lim muassasalariga Misrning Al-Azhar majmuasi ustozlari jalb etildi. 90 ta fan dasturi va yangi avlod darsliklari yaratildi. Mir Arab, Xadichai Kubro, Hidoya va Ko‘kaldosh madrasalari zamonaviy binolarga ega bo‘lib, Iordaniya, Misr va Birlashgan Arab Amirliklarining yetakchi oliy ta’lim muassasalari bilan hamkorliklar rivojlanmoqda.
Ushbu nufuzli anjumandan ko‘zlangan maqsad ham professor-o‘qituvchilar uchun ilmiy-amaliy muloqot maydonini yaratish, pedagoglarning kasbiy salohiyatini yuksaltirish, ta’lim jarayoniga raqamli va innovatsion usullarni keng joriy etishdir.
O‘zbekiston musulmonlari idorasi Matbuot xizmati
