Saudiya Arabistonidagi etakchi elektron ommaviy axborot vositalaridan biri - “Swift News” elektron nashri sahifasida “O'zbekiston - go'zal tabiat va tarixiy obidalar mamlakati” sarlavhali maqola e'lon qilindi, deb xabar bermoqda “Dunyo” AA muxbiri.
Unda zamonaviy O'zbekiston o'zining go'zal tabiati va rang-barang tarixiy obidalari bilan butun jahon ahlini hayratga solib kelishi, dunyoni Sharqdan G'arbgacha Buyuk Ipak yo'li bilan bog'laydigan O'zbekiston jo'g'rofiy jihatdan o'ziga xos joylashuvga ega bo'lgani bois muhim sayyohlik maskaniga aylanib qolgani alohida qayd etilgan.
Maqolada O'zbekiston o'zining qadimiy tarixi, madaniyati va ma'naviy merosi bilan dunyoga mashhur bo'lib, u bugungi kunda Ibn Sino, Al-Horazmiy, Al-Buxoriy, At-Termiziy, Al-Horazmiy, Al-Beruniy va Alisher Navoiy kabi mashhur alloma va mutafakkirlar yurti sifatida jahon sayyohlari o'rtasida dong taratganiga alohida e'tibor qaratilgan.
“O'zbekiston hududida turli davr va tsivilizatsiyalarga oid 7 mingdan ortiq yodgorliklar mavjud bo'lganligi bois uni haqli ravishda “Tarix xazinasi”, deb atashadi. Horazmdagi “Ichon-qal'a” majmuasi, Buxoro, Shahrisabz va Samarqand shaharlaridagi tarixiy yodgorliklarning aksariyati YuNESKO Jahon merosi ro'yxatidan joy olgan”, deb yozadi elektron nashr.
Maqolada sayyohlik zavqi tabiiy go'zallik, arxeologik tarix va rang-barang madaniyatlar bilan cheklanib qolmasdan asrlar davomida mavjud bo'lgan va o'zbek xalqining urf-odatlari hisoblangan mehmondo'stlik va taomlarining beqiyos ta'mi bilan ortib borishi alohida qayd etilgan.
“O'zbekiston so'nggi besh yilda tubdan rivojlanib bordi. Turizm sohasidagi davlat siyosatining yangi tamoyillari infratuzilmani jadal rivojlantirishga ko'maklashdi. Eng yangi texnologiyalar asosida o'n bitta xalqaro aeroport barpo etildi va bu O'zbekiston milliy aviakompaniyasiga Yevropa, Osiyo, Yaqin Sharq va Amerikaning 50 dan ortiq shaharlariga havo qatnovlarni tashkil etishga yordam berdi.
Yangi O'zbekistonning turizmni rivojlantirish siyosati sayyohlarga xizmat ko'rsatadigan barcha qulayliklarni, xususan, hashamatli mehmonxonalar, zamonaviy transport vositalari, mamlakatning turli joylariga olib boradigan tezyurar poyezdlarni yo'lga qo'yishga turtki berdi. “Afrosiyob” tezyurar poyezdi 2011 yildan boshlab xizmat ko'rsatmoqda. Mamlakatda ekologik va geografik turizm, sog'lomlashtirish va madaniy sayyohlik yo'nalishlarini rivojlantirishga ham katta ahamiyat berilmoqda. Bu mamlakatga sayyohlar oqimining ko'payishiga ijobiy ta'sir ko'rsatayotir. O'zbekistonda 1995 yildan boshlab har yili kuz faslida “Toshkent xalqaro turizmi ko'rgazmasi” o'tkazib kelinmoqda. Ushbu sayyohlik anjumani turizm infratuzilmasining rivojlanishi sohasida faoliyat yurituvchi hamkorlar o'rtasida konstruktiv muloqot olib boriladigan muhim maydonga aylandi”, deb yozadi “Swift News”.
Maqolada O'zbekistonning asosiy va tarixiy shaharlari haqidagi atroflicha ma'lumotlar ham o'quvchilarning e'tiboriga havola qilingan.
Bundan tashqari, “Swift News” elektron nashri sahifasida “O'zbekiston Frantsiyadagi muzeylarda o'z mamlakati merosi va madaniyatiga oid ikkita ko'rgazma tashkil etdi” sarlavhali maqola ham rang-barang suratlar bilan birga e'lon qilindi.

O'zbekiston musulmonlari idorasi matbuot xizmati