Er-xotin o'rtasidagi sirni tarqatish - gunoh
Cavol: Chimildiq kuni yangalarni yotoqxonaga kirishi, qo'pol qilib aytganda ularga doka berish va shunga o'xshagan ishlar haqida nima deya olasiz?
Javob: Bismillahir Rohmanir Rohim.
Bu ish mutlaqo noto'g'ri va sharmandalikdan boshqa narsa emas. Dinimizda er-xotin o'rtasida to'shakda bo'ladigan maxfiy ishlarni boshqalarga aytishdan qaytariladi.
Abu Sa'id roziyallohu anhudan rivoyat qilinadi. Nabiy sollallohu alayhi vasallam: "Qiyomat kuni Allohning nazdida martabasi eng yomon odam ayoliga yaqinlik qilib, ayoli unga yaqin bo'lganidan keyin sirini odamlarga yoyib yuradigan kishidir", dedilar (Imom Muslim va Imom Ahmad rivoyati). Vallohu a'lam.
O'zbekiston musulmonlari idorasi Fatvo markazi.
Buxoroda Qur’on musobaqasi o‘tkazildi
O‘zbekiston Respublikasi Davlat mustaqilligining 35 yilligi munosabati bilan Buxoro viloyatida faoliyat olib borayotgan imom-xatib va imom-noiblar o‘rtasida “Qur’on tinchlikka buyuradi” shiori ostida Qur’on musobaqasi o‘tkazildi.
Ochilish marosimida Buxoro viloyati bosh imom-xatibi Jobir domla Elov so‘zga chiqib, mazkur ma’rifiy tadbirning ahamiyati haqida so‘zlab, ishtirokchilarga muvaffaqiyat tiladi.
Musobaqani o‘tkazishdan ko‘zlangan maqsad diniy soha xodimlarining Qur’oni karim bo‘yicha bilim va mahoratini yanada oshirish, ular o‘rtasida o‘zaro hamjihatlik muhitini shakllantirishdir.
Bellashuvda viloyatning tuman va shaharlarida faoliyat yuritayotgan 10 nafar imom-xatib va imom-noib ishtirok etib, Qur’oni karimni o‘qish va yoddan bilish borasidagi bilim va mahoratini namoyish etishdi.
Birinchi o‘ringa Peshku tumani “Chiqirchi” jome masjidi imom-noibi Afzal Shavkatov sazovor bo‘ldi. Ikkinchi o‘rin Buxoro shahridagi “Volidi Abdulazizxon” jome masjidi imom-noibi Abduvohid Akramovga, uchinchi o‘rin Jondor tumani “Raboto‘g‘lon” jome masjidi imom-xatibi Shuhrat Sherovga nasib etdi.
G‘oliblarga diplom va qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
