Ikki karra sa'y-harakat qiling!
Inson zotida chegaralanmagan imkoniyat, katta iqtidor mavjud. Agar kuchli irodaga va oldinga qo'yilgan aniq maqsadlarga ega bo'lsak, hammamiz ham bu iqtidordan foydalanishga qodirmiz!
Haqiqiy, to'laligicha muvaffaqiyatga erishish kaliti – say'-harakatni ikki karra ko'paytirishingiz, mutaxassisligingiz va ishingizni aniqlashtirib olishingiz hamda zamon bilan hamnafas bo'lishingizdadir.
Sahobiy Rabiy'a ibn Ka'b Aslamiyning Habibimiz sollallohu alayhi vasallam bilan bo'lgan qissasida himmatni oliy qilish va shunga yarasha harakatni ko'paytirish kerakligiga dalil bor. U kishi aytadi:
“Men Rasululloh sollallohu alayhi vasallam bilan birga tunab qoldim, uyg'ongach u zotga tahorat suvi va boshqa ehtiyojlarini olib keldim. Shunda u zot: “So'ra”, dedilar. Men: “Jannatda siz bilan birga bo'lishni so'rayman”, dedim. U zot: “Boshqa hech narsami?” dedilar. Men “Faqat shu”, dedim. Rasululloh sollallohu alayhi vasallam: “Unda bu borada ko'p sajda qilish bilan menga yordamlash”, dedilar”.
Mulohaza qilaylik, u faqat jannatni xohlayman, demadi, balki Habibulloh sollallohu alayhi vasallamga qo'shni bo'lishni so'radi. Oliy himmat mana shunday bo'ladi. Keyin Payg'ambarimiz alayhissalom qisqa javob qaytardilar: “Unda bu borada ko'p sajda qilish bilan menga yordamlash”.
Bunda “Harakatingni ko'paytir” degan zo'r strategiyani asoslash bor.
Hayotda muvaffaqiyatga erishishni istasangiz, harakatingizni ikki hissa oshiring, niyatingizni xolis Alloh uchun qiling, shunda Alloh sizga baraka beradi.
Jannatni isstasangiz, sunnatlarga amal qilishda, istig'for aytishda, ro'za tutish, toat-ibodatlarda, yaxshi amallarda va sadaqotlar berishda faolligingizni oshiring!
Odamlarning muhabbatini qozonishni xohlasangiz, ularga imkon qadar ko'proq e'tibor bering, ularni hurmat qiling, ishini yaxshi bajarganlarga maqtov so'zlarni ayting!
Hayotdagi hamrohingiz, ya'ni ayolingiz qalbini mahv etmoqchi bo'lsangiz, e'tiboringizni doimgidan ko'paytiring, uni mehr-muhabbat buloqlaridan oqib chiqqan suvlar bilan mehmon qiling, kamchiliklaridan ko'z yumib, mehringizni, oliyjanobligingizni namoyon eting!
Agar solih farzandlaringiz bo'lishini istasangiz, ular bilan tez-tez suhbat qurib turing, ularning gapini tinglang. Tarbiyaning eng yaxshi uslublarini ularda qo'llang va har namoz so'nggida ularning haqqiga duo qiling. Nafaqat har namoz oxirida, har doim duoda bo'ling!
Men bir yoshi katta ayolni tanir edim, uning oltita o'g'li, to'rtta qizi bor edi. Hamma farzandlari ota-onasiga itoatli solih farzandlar edi. Bir kuni o'sha ayoldan so'radim: “Farzandlaringizni qanday qilib bunday chiroyli tarbiyalashga erishdingiz?” Shunda u aytdiki: “Voy bolajonim, men oddiy ish qildim xolos: hayotim davomida bitta ham namozni qo'ymay Allohdan ularga hidoyat va baxt-saodat so'rab duo qildim”.
Doktor Hasson Shamsi Poshoning "Metin qoyalar" kitobidanG'iyosiddin Habibulloh, Ne'matulloh Isomov tarjimasi.
“Uthaym” gazetasi: Madaniy merosni asrash Yangi O‘zbekiston taraqqiyotining muhim yo‘nalishiga aylangan
Shri-Lankaning “Uthaym” nashrida O‘zbekistonning boy tarixiy-madaniy merosi, uni asrab-avaylash va kelajak avlodlarga bezavol yetkazish borasida amalga oshirilayotgan ishlarga bag‘ishlangan maqola e’lon qilindi, deb xabar bermoqda “Dunyo” AA.
Materialda Yangi O‘zbekistonda milliy qadriyatlarni tiklash, madaniy meros obyektlarini muhofaza qilish, ilm-fan va ma’rifatni rivojlantirishga qaratilgan islohotlar yuksak baholangan.
Ta’kidlanganidek, so‘nggi yillarda O‘zbekistonda ma’naviy-ma’rifiy sohani tubdan takomillashtirish, xalqning ko‘p asrlik boy ilmiy-madaniy merosini o‘rganish hamda uni jahon hamjamiyatiga keng targ‘ib etish davlat siyosatining ustuvor yo‘nalishlaridan biriga aylandi.
Mamlakatda tarixiy obidalarni restavratsiya qilish, muzeylar va arxivlar faoliyatini modernizatsiya qilish, qo‘lyozmalarni asrab-avaylash va raqamlashtirish, milliy madaniy merosni xalqaro miqyosda targ‘ib qilishga qaratilgan tizimli ishlar amalga oshirilayotgani qayd etilgan.
Maqolada Prezident Shavkat Mirziyoyev tashabbusi bilan ilgari surilgan Uchinchi Renessans g‘oyasi mamlakat taraqqiyotining muhim strategik yo‘nalishi sifatida alohida e’tirof etilgan. Muallif fikricha, mazkur g‘oya nafaqat tarixiy merosni asrab-avaylash, balki ilm-fan, ta’lim, madaniyat va innovatsiyalarni uyg‘un rivojlantirish orqali mamlakatning intellektual va ma’naviy salohiyatini yuksaltirishga xizmat qilmoqda.
Uchinchi Renessans konsepsiyasi O‘zbekistonning buyuk ilmiy an’analarini qayta tiklash, yosh avlodni bilimli va vatanparvar etib tarbiyalash hamda mamlakatning xalqaro nufuzini yanada mustahkamlashga qaratilgan umummilliy dastur sifatida baholanmoqda.
Gazetaning yozishicha, O‘zbekistonda kechayotgan o‘zgarishlar faqat madaniy sohadagi islohotlar bilan cheklanmaydi. Ular mamlakatning ilmiy, ma’naviy va intellektual taraqqiyotini ta’minlashga qaratilgan uzoq muddatli strategiyaning ajralmas qismi hisoblanadi. Ilmiy muassasalar faoliyatini qo‘llab-quvvatlash, tarixiy manbalarni tadqiq etish, madaniy merosni muhofaza qilish va zamonaviy ta’lim tizimini rivojlantirish kabi yo‘nalishlar yagona maqsad — Yangi O‘zbekistonning mustahkam ma’naviy poydevorini yaratishga xizmat qilayotgani alohida qayd etilgan.
Maqolada Toshkent shahrida barpo etilgan O‘zbekiston Islom sivilizatsiyasi markazi faoliyatiga keng o‘rin ajratilgan.
Prezident Shavkat Mirziyoyev tashabbusi va g‘oyasi asosida barpo etilgan mazkur betakror majmua O‘zbekistonning madaniy va ilmiy siyosatidagi eng muhim istiqbolli loyihalardan biri bo‘ldi. Markazda VII asrga oid noyob Usmon Mus'hafi saqlanayotgani uning tarixiy ahamiyatini yanada oshiradi.
Shu bilan birga, bu yerda qo‘lyozmalarni ilmiy o‘rganish, restavratsiya qilish, arxiv materiallarini tizimlashtirish va zamonaviy texnologiyalar asosida raqamlashtirish uchun barcha zarur sharoitlar yaratilgan.
Gazetada O‘zbekistonning YUNЕSKO va boshqa xalqaro tashkilotlar bilan madaniy merosni muhofaza qilish sohasidagi hamkorligi, tarixiy obidalarni asrab-avaylash, ularni xalqaro turizm va ilmiy tadqiqotlar bilan uyg‘un rivojlantirishga qaratilgan sa’y-harakatlari haqida so‘z yuritilgan.
O‘zbekiston musulmonlari idorasi Matbuot xizmati
