O'zbekistonning Seuldagi elchixonasi vakillari Koreya Musulmonlar federatsiyasi prezidenti Kim Dong Yok va Koreyadagi musulmonlar jamoati bosh imomi Li Dju Hva bilan uchrashuv o'tkazishdi, deb xabar qilmoqda “Dunyo” AA muxbiri.
Unda ziyorat turizmi va boshqa sohalardagi o'zaro hamkorlikni rivojlantirish bilan bog'liq masalalar muloqotning asosiy mavzusi bo'ldi. Shuningdek, Koreya Musulmonlar federatsiyasi rahbariyatining joriy yil 1-5 noyabr' kunlari O'zbekistonga amalga oshirgan safari va uning doirasida yurtimizda o'tkazilgan “Halqaro ziyorat turizm haftaligi”dagi ishtiroki yakunlari ham atroflicha muhokama qilindi.
Federatsiya prezidenti Kim Dong Yok o'zining mamlakatimizga safaridan orttirgan taassurotlarini o'rtoqlashar ekan, bunday nufuzli xalqaro tadbirda qatnashish, qolaversa faxrli mehmonlar safida ochilish marosimida so'zga chiqish imkoniyati taqdim etilganligi uchun minnatdorlik izhor etdi.

Uning so'zlariga ko'ra, “Halqaro ziyorat turizm haftaligi” juda yuqori saviyada tashkil etildi va samarali yakunlandi.
– Ayniqsa, o'zbekistonlik allomalarning islom ilmi va madaniyati rivojiga qo'shgan hissasi, xattotlik san'tidagi mahorati tahsinga loyiqdir, – dedi u. – Ziyorat haftaligi xorijlik ishtirokchilarga O'zbekistonning Islom tsivilizatsiyasidagi alohida o'rni to'g'risida atroflicha ma'lumotlarni taqdim etdi.

Koreyadagi musulmonlar jamoati bosh imomi Li Dju Hva Buxoro shahriga ziyorati va Mir Arab madrasasining 600 yilligiga bag'ishlangan marosimda ishtiroki juda mazmunli va esda qolarli bo'lganini ma'lum qildi.
– Mir Arab madrasasi misolida O'zbekistonda asrlar davomida shakllangan yuksak darajadagi islom dini ta'limoti va islomiy ma'rifatni his qilishga muvaffaq bo'ldik, – dedi koreyalik imom.
Shuningdek, Koreya Musulmonlar federatsiyasi delegatsiyasi mamlakatimizga safari davomida O'zbekiston musulmonlari idorasi raisi, muftiy Nuriddin Holiqnazarov hamda O'zbekiston Respublikasi Vazirlar Mahkamasi huzuridagi Islom tsivilizatsiyasi markazi rahbariyati bilan bo'lib o'tgan samarali uchrashuvlar samarali bo'lgani ham qayd etildi.

Mazkur uchrashuvlarda erishilgan kelishuvlarni amalga oshirish doirasida O'zbekistonning ziyorat turizm yo'nalishidagi ulkan salohiyatini Janubiy Koreya ommasiga keng targ'ib qilish va kelgusida ushbu mamlakatdan sayyohlarni jalb etishga doir rejalar belgilab olindi.

O'zbekiston musulmonlari ma'muriyati matbuot xizmati