Mamlakatimizning Jidda shahridagi Bosh konsulxonasi tomonidan Saudiya Arabistoni Podshohligi Haj va umra vazirining xalqaro hamkorlik bo'yicha o'rinbosari Hasan Allamnaxra bilan uchrashuv tashkil etildi, deb xabar qilmoqda “Dunyo” AA muxbiri. Unda ikki tomonlama hamkorlikka oid qator muhim masalalar muloqotlarning asosiy mavzusi bo'ldi.
Suhbat avvalida H.Allamnaxra joriy yil 27-30 sentyabr' kunlari Saudiya Arabistonining Haj va umra masalalari bo'yicha vaziri Tavfiq ar-Rabi'a boshchiligidagi delegatsiyaning O'zbekistonga tashrifi muvaffaqiyatli va samarali kechganini ta'kidlar ekan, Saudiya delegatsiyasining O'zbekiston Prezidenti tomonidan qabul qilingani, Toshkentda o'tkazilgan ikki tomonlama samarali uchrashuvlar va o'zbekona mehmondo'stlik uchun chuqur minnatdorlik izhor etdi.
Suhbatdosh Toshkentdagi uchrashuvlarda ko'tarilgan muhim masala - Makka yoki Jidda shahrida “Imom Buxoriy yurti avlodlari” mavzusidagi xalqaro konferentsiya va ko'rgazmani tashkil etish atroflicha o'rganib chiqilayotgani va bunda Saudiya vazirlik va idoralari hamda Butunjahon musulmonlar uyushmasi faol ishtirok etayotganini ma'lum qildi.
O'zbekiston tomonidan Umra mavsumida mamlakatimizdan Saudiya Arabistoniga kelayotgan ziyoratchilarning soni ortib borayotgani va ularga Podshohlik hukumati yaratayotgan sharoitlar yuqori baholandi.
Shu o'rinda O'zbekistonda sayyohlik industriyaning rivojlanib borayotgani ta'kidlanar ekan, Saudiya Arabistonidan ham Toshkentga kelayotgan sayyohlarning sonini oshirishga e'tibor qaratish muhimligi alohida qayd etildi.
Suhbat chog'ida Hasan Allamnaxra “agar saudiyaliklar O'zbekistonning sayyohlik salohiyatini yanada yaqindan bilganlarida ular Yevropa davlatlariga emas, balki Imom Buxoriy vatanini ziyorat qilar edilar”, dedi.
Muloqot chog'ida mamlakatimiz sayyohlik salohiyatini Saudiyada keng targ'ib etish, O'zbekiston turkompaniyalari tomonidan oilaviy turistik paketlarning ishlab chiqilishidagi afzalliklar, Jidda shahrida Haj va umra masalalariga bag'ishlangan xalqaro konferentsiya tashkil etilishi hamda uning ishida mamlakatimiz vakillari ishtiroki bilan bog'liq va kun tartibidagi boshqa dolzarb masalalar atroflicha muhokama etildi.

O'zbekiston musulmonlari idorasi matbuot xizmati