Ibrohimjon domla Inomov: Korruptsiyaga qarshi kurashish barchaning burchi
So'nggi yillarda mamlakatimizda korruptsiyaga qarshi kurashish sohasida muhim islohotlar amalga oshirildi. Aholining huquqiy ongi va madaniyatini oshirish, jamiyatda korrupsiyaga murosasiz munosabatni shakllantirishga yo'naltirilgan tizimli choralar ko'rilmoqda.
O'zbekiston xalqaro islom akademiyasida “Jinoyatchilik va huquqbuzarliklarni oldini olish, korrupsiyaga qarshi kurashish” mavzusida davra suhbati tashkil etildi. Tadbirda O'zbekiston musulmonlari idorasi raisi o'rinbosari Ibrohimjon domla Inomov, Ichki ishlar vazirligi jamoat xavfsizligi departamenti Probatsiya xizmati etakchi mutaxassis psixologi, katta leytenant Ahror Serkaboyev, Shayxontohur tumani Ichki ishlar bo'limi yoshlar masalalari bo'yicha katta inspektori, kapitan Azizbek Yusufjonov, Akademiya prorektorlari – Zohidjon Islomov, Ilyos Mirziyotov, Zokirjon Ro'ziyev, Korruptsiyaga qarshi kurashish “Komplayens-nazorat” tizimini boshqarish bo'limi bosh mutaxassisi Shuhrat Eshmatovlar ishtirok etdi.
Shuningdek, davra suhbatida akademiya fakul'tetlari dekanlari, kafedra mudirlari, professor-o'qituvchilar, bo'lim boshliqlari, xodimlar qatnashdi.
Davra suhbatida yurtimizda korruptsiyaga qarshi kurash borasida amalga oshirilayotgan ishlar, poraxo'rlik, tamagirlik kabi huquqbuzarliklarni aniqlash va ularga chek qo'yish, bunday jinoyatlarga qarshi jazo muqarrarligini har bir shaxs bilishi zarurligi haqida so'z yuritildi.
Tadbirda so'zga chiqqan Ibrohimjon domla Inomov korruptsiya, poraxo'rlik dinimiz ta'limotiga ko'ra xarom ekani va uni oluvchi ham beruvchi ham do'zaxiy bo'lishi haqida oyatu hadislardan misollar keltirib, bu illatga qarshi kurashish barchaning burchi ekanini ta'kidladi.
Darhaqiqat, korruptsiya mamlakat taraqqiyotini ortga surib, kelajakni xavf ostida qoldiradi. Ayniqsa, ta'lim sohasidagi korrupsion holatlar rivojlanish va taraqqiyot yo'lini tanlagan mamlakat yuksalishiga raxna soladi. Bunday jirkanch illatlarning tomir otishiga yo'l berilsa, o'sha joyda taraqqiyot va rivojlanish boy beriladi.
Tadbir davomida soha mutaxassislari tinglovchilarga mavzu bo'yicha batafsil kerakli ma'lumot va tavsiyalarini berishdi.
O'zbekiston xalqaro islom akademiyasi
Matbuot xizmati
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
