Mutaassiblar jinoyati
"Mulohaza qilib ko'rsam hindlar dohiysi Gandini hindu dinidagi mutaassib o'ldirgan ekan.
1967 yil o'z millatiga buyuk g'alaba taqdim qilib, Falastin eri hisobidan Isroil chegarasini ikki barobar kengaytirgan Ishoq Rabinni yahudiy dinidagi mutaassib qatl qilgan ekan.
Islomiy kurashlar bahodiri Ali ibn Abu Tolib roziyollohu anhuni mutaassib xavorij musulmon o'ldirgan ekan.
Dunyoda dinning ruhini yo'qotib qo'yganlar bor. Ular ko'proq dinning kiyimlariga, belgi-alomatlariga e'tibor berishadi. So'ngra uni jamiyat tomonga tortishadi. Ular poklashni emas, ayblashni joyiga qo'yishadi. Qurishni emas, buzishni o'rniga qo'yishadi.
Dinni biladiganlar va unga da'vat qiladiganlardan uni chiroyli tushuntirish va tarbiyani chiroyli qilish talab qilinadi. Yuzaga emas, botinga e'tibor berishimiz kerak. Libosga emas, qalbga ahamiyat qaratishimiz lozim!".
Muhammad G'azzoliy rohimahullohning "Achchiq haqiqat" kitobidan.
N. Imamov.
Buxoroda diniy soha xodimlariga yuksak e’tirom ko‘rsatildi
Vatanimiz mustaqilligining 35 yillik bayrami arafasida Buxoro viloyatida jamiyatda milliy-diniy qadriyatlarni mustahkamlash, el-yurt ma’naviyati va osoyishtaligini ta’minlash yo‘lida fidokorona mehnat qilayotgan diniy-ma’rifiy soha xodimlarini taqdirlashga bag‘ishlangan tantanali tadbirlar bo‘lib o‘tdi.
Davlatimiz rahbarining tegishli farmonlariga muvofiq, diniy sohada samarali faoliyat yuritib kelayotgan bir guruh soha xodimlari yuksak davlat mukofotlari bilan taqdirlandilar. Marosimda Buxoro viloyati hokimining o‘rinbosari Azizbek Qalandarov ishtirok etib, yig‘ilganlarni qutlug‘ ayyom bilan samimiy qutladi va davlat mukofotlarini o‘z egalariga tantanali ravishda topshirdi.
Shuningdek, bayram munosabati bilan viloyat hokimligi tashabbusi asosida soha fidoyilariga maxsus vaucherlar taqdim etildi. Tadbirda so‘z olganlar davlatimiz tomonidan ma’naviy-ma’rifiy soha xodimlariga qaratilayotgan yuksak e’tibor va g‘amxo‘rlik uchun minnatdorlik bildirdilar.
Bundan tashqari, O‘zbekiston musulmonlari idorasi Buxoro viloyati vakili, viloyat bosh imom-xatibi Jobir domla Elov tomonidan viloyat vakilligi tasarrufida samarali xizmat ko‘rsatib kelayotgan bir guruh diniy soha xodimlariga tashakkurnomalar topshirildi.
Ko‘tarinki ruhda o‘tgan marosimlarda bunday yuksak e’tibor va ehtirom soha fidoyilarini el-yurt farovonligi va dinimiz sofligini targ‘ib etish yo‘lidagi xayrli faoliyatga yanada kuch-g‘ayrat bilan kirishishga ruhlantirishi ta’kidlandi.
O‘zbekiston musulmonlari idorasi
Matbuot xizmati
