Bundan besh yilcha oldin muhtaram Prezidentimiz Shavkat Mirziyoev Toshkent viloyatiga tashrif buyurganlarida “Qur'onni eshitish, eshita olish yuksak ma'naviyat, ma'rifat. Qur'on hech qachon yomonlikka da'vat qilmaydi. Agar Qur'oni karimni eshita olsak, eshittira olsak, bu muvaffaqqiyat bo'ladi, elimizga nur keladi”, deya ta'kidlagan edilar.

Darhaqiqat, mamlakatimizda barcha sohalar qatori diniy-ma'rifiy yo'nalishda amalga oshirilayotgan ulkan islohotlar yurtimiz mo'min-musulmonlarini behad quvontiryapti. Foydalanishga topshirilayotgan yangi masjidlar namozxonlarning bahridilini ochayotgan, yangi madrasalar yoshlarga ilm o'chog'i bo'layotgan bo'lsa, “Qur'oni karim va tajvid” o'quv-kurslari xalqimizga ziyo taratishda muhim ahamiyat kasb etyapti.

O'zbekiston Respublikasi Prezidentining 2018 yil 16 apreldagi “Diniy-ma'rifiy soha faoliyatini tubdan takomillashtirish bo'yicha chora-tadbirlar dasturi”ning 6-bandi ijrosini ta'minlash hamda fuqarolarning Qur'oni karimni tajvid bilan o'qishga bo'lgan ehtiyojini qondirish maqsadida Toshkent viloyatining Angren, Bekobod, Chirchiq, Nurafshon va Yangiyo'l shaharlarida Qur'oni karim va tajvid bo'yicha o'quv-kurslari faoliyati yo'lga qo'yildi.

O'zbekiston musulmonlari idorasining 01A/117-sonli buyrug'i asosida tashkil etilgan mazkur o'quv-kurslarida endilikda malakali mutaxassislar, Qur'oni karim xodimlari yurtdoshlarimizga Kalomullohni o'rgatadilar.

Qur'oni karim – Alloh taoloning insoniyatni dunyo va oxirat saodatiga eltuvchi muqaddas kalomidir. Payg'ambarimiz sollallohu alayhi va sallam Qur'oni karimni Alloh taolodan qabul qilib olib, ummatlariga omonat ila etkazganlar, uni o'zlari hayotga tatbiq etib ko'rsatganlar.

Payg'ambarlarning merosxo'rlari bo'lgan ulamolarning vazifasi ushbu ilohiy omonatni – Qur'oni karimni xalqqa etkazish bo'lib kelgan va kelmoqda. Qur'oni karimni o'rganish, yod olish va o'rgatish Islomda ajri ulug' amal sanaladi. Shu bois qadim tariximiz davomida Qur'oni karim o'qilmagan, Mushafi sharif kirmagan xonadon bo'lmagan.

Allohga shukrki, yana xonadonlarimizga, qalblarimizga, ko'ngillarimizga Qur'oni karim kirib boryapti.

Qur'oni karimni o'rganish va o'rgatishning savobi juda ulug'. Kalomullohda mo'minlarni Allohning oyatlarini tadabbur qilishga, hukmlarnini teran anglashga, tilovat qilinayotganda tinglash va jim turishga buyurilgan.

Alloh taolo marhamat qiladi: «Albatta, Allohning kitobini tilovat qiladiganlar, namozni to'kis ado etib, Biz ularga rizq qilib bergan narsalardan maxfiy va oshkora infoq qilganlar, hargiz kasodga uchramaydigan tijoratdan umidvor bo'lurlar»(Fotir surasi, 29-oyat).

Boshqa bir oyatda esa: «Qur'on tilovat qilganda uni tinglanglar va jim turinglar, shoyad rahmatga erishsangiz»(A'rof surasi, 204-oyat), deb marhamat qilingan.

Hadisi shariflarda ham insonlarning eng yaxshisi bayon qilina turib, bu borada ham Qur'oni karimni o'rgangan va o'rgatgan kishilar bashariyatning eng xayrlisi ekani e'tirof etiladi.

Hazrati Usmon roziyallohu anhudan rivoyat qilinadi. Nabiy sollallohu alayhi va sallam bunday dedilar: “Sizlarning yaxshilaringiz Qur'onni o'rganganlaringiz va o'rgatganlaringizdir”(Imom Buxoriy rivoyati).

Qur'on kirib borgan, o'qiladigan har bir xonadonga Alloh taoloning fayz-barakoti, nuri yog'ilib turadi. Qur'oni bor xonadonda tarbiyalangan farzandlar diniga, el-yurtiga, millatiga sodiq vatanparvar, chinakam avlod sifatida kamol topadi. Zero, bashariyat tamadduniga benazir hissa qo'shgan buyuk mutafakkir allomalarimizning qay biri hayotiga nazar solsak, albatta, ularning barchasi yoshligidanoq Qur'oni karimni yod olganiga guvoh bo'lamiz.

Bugun biz Yangi O'zbekistonda muhtaram Yurtboshimiz boshchiligida Uchinchi renessansning poydevorini qo'yayotgan ekanmiz, albatta, bu jarayonda farzandlarimizning Qur'oni karimni o'rganishini ta'minlashimiz kerak. Shunda yana Buxoriylar, Horazmiylar, Beruniylar, Navoiylar tug'ilajak, inshoalloh.

Alloh taolo aziz diyorimizni Qur'on nuri bilan munavvar aylasin, bu buyuk xizmatga bel bog'lab, xayrli ishlarga bosh-qosh bo'layotgan Prezidentimiz Shavkat Mirziyoevni O'zining hifzu himoyasida asrab, ko'zlagan barcha ezgu maqsadlariga etkazsin, niyatlarini ro'yobga chiqarib, o'ylaganlaridan ham ziyoda natijalarga erishtirsin.

Yangi ochilgan Qur'oni karim kurslari faoliyati bardavom bo'lsin. Bunday nur taratadigan maskanlar soni ko'paysin. Bu maskanlarda ta'lim olgan yurtdoshlarimiz elimizga, Vatanimizga xizmat qilsin.

Jasurbek RAUPOV,

Toshkent viloyati bosh imom-xatibi