Odamzod o'ziga ato etilgan aql va ilmni ishga solib, jahonda ro'y berayotgan ilmiy kashfiyot va izlanishlardan boxabar bo'lib turmasa va o'z hayotiga tadbiq etishni kechiktirsa, taraqqiyotda qoloqlikka mubtalo bo'ladi. Hozirgi zamonimizda texnika taraqqiyoti markazida qaysi mamlakatlar turibdi, nima uchun ular shu darajada ilgarilab ketdi, degan savolga javob qidirib ko'raylik. Oddiygina qilib aytadigan bo'lsak, ular ilmsizlik, ko'r-ko'rona hayot kechirishdan ko'ra, mashaqqatli va og'ir bo'lsa-da, ilmiy kashfiyot va izlanishlar yo'lini tanladi. Bu yo'lda qanday yo'qotishlar, umidsizliklarga duch kelmasin, baribir muayyan maqsad sari olg'a intilaverdi. Nihoyat, ularga ilm yorug' yo'l ko'rsatdi.

Bugungi kunda johillik va ilmsizlikka cho'mgan xalqlar eng oxirgi rusumda yaratilgan jihoz va mato ishlab chiqaradigan davlatlarga qaram bo'lib qolaëtgani sir emas. Chunki bunday xalqlar ustiga bostirib borish shart bo'lmay qoldi. Bir parcha temirni olgin-da, komp'yuter yoki shunga o'xshash narsa shakliga aylantiru tillo bahosida sot, o'zi kelib jon-jon deya olib ketadi, degan shior bugungi kunning “taraqqiyot shiori” desak noto'g'ri bo'lmasa kerak. Bir asr oldin ilmiy texnika yutuqlaridan etarli darajada foydalanilmagan yurtimizda hammasi o'z o'rniga qayta boshladi.

Endigi avlod ham ilm yo'lida shunga yarasha harakat qilib, fidoyilik ko'rsatsa, jaholat va ilmsizlikdan tezroq qutulamiz va ilg'or xalqlar safiga qo'shilamiz, inshaalloh.

"Hijriy-qamariy taqvim"dan.