Bugun, 7 iyul' kuni viloyatda bo'lib o'tgan «Baxt» jome masjidining rasmiy ochilish marosimida O'zbekiston musulmonlari idorasi raisining birinchi o'rinbosari Homidjon domla Ishmatbekov qatnashdi.

Honaqohi keng va chiroyli bo'lib, 3 ming nafar odamni sig'diradi. Tashqi tarafidan 37 metrli minora masjidga o'zgacha ko'rk berib turibdi. Zamonaviy tahoratxonasida barcha sharoitlar hozirlangan. Shuningdek, jomening yon qismida ayollar uchun ham alohida namozxona qilingan.

— Ilk bor 1940 yili qurilgan masjid bugungi kunga kelib ta'mirtalab bo'lib qolgan edi, ayni kunda ushbu manzilda zamon talablariga mos yangi masjidni ochdik. Bu Qurbon hayiti bayrami arafasida hudud mo'min-musulmonlariga katta tuhfa va xursandchilik bo'ldi, — deydi masjid imom-xatibi Nurmuhammad domla Narzullayev.

Peshin namozidan so'ng O'zbekiston musulmonlari idorasi raisining birinchi o'rinbosari Homidjon domla Ishmatbekov masjid qavmini yana bir yangi jome bilan muborakbod etib, muhim mavzuda ma'ruza qilib berdi. Yakunda xayrli duolar qilindi.

O'zbekiston musulmonlari idorasi Matbuot xizmati
Muslim.uz