Marokash aholisi “Jasur” Islom ko'rgazmasidan katta manfaat oldi
Saudiya Arabistoni Podshohligi Islom ishlari, da'vat va irshod vazirligi tomonidan Kasablanka shahrida tashkil etilgan “Jasur” Islom ko'rgazmasini Marokash xalqi katta mamnuniyat bilan qarshi oldi.
“IQNA” saytining “Al Youm” nashriga tayanib xabar berishicha, “Jasur” islom ko'rgazmasi Saudiya Arabistoni Podshohligi Islom ishlari, da'vat va irshod vazirligi tomonidan Marokash Podshohligi Vaqf vazirligi bilan hamkorlikda tashkil etilgan. Ushbu ko'rgazma hozirda Kasablankadagi Hasan II masjidi fondida o'tkazilmoqda.
Ushbu ko'rgazmada Makka va Madinadan olingan tarixiy qo'lyozma va nodir Islom yozuvlari, fotosurat va hujjatli fil'mlar, tarixiy masjidlar, Qur'on musobaqalari, Islom xattotligi ko'rgazmalari o'rin olgan. Ziyoratchilar virtual reallik texnologiyasidan foydalangan holda haj ziyoratini ham ado etish to'g'risidagi ma'lumotlarga ega bo'lishi mumkin.
Marokash maktablarining ko'plab talabalari ham ushbu ko'rgazmaga tashrif buyurishdi va Saudiya Arabistonidagi islom madaniyatining turli ko'rinishlari bilan tanishishdi. Virtual reallik texnologiyasidan foydalangan holda, bu talabalar Makka shahridagi Masjidul Haromga tashrif buyurib, Haj va Umra marosimlari bilan tanishdi. Bundan tashqari, ular Shahada, Sahih va Rushd kabi maxsus diniy ilovalar bilan ishlashni o'rgandi.
Ushbu ko'rgazma ishtirokchilari “Qirol Fahd” majmuasining Qur'oni karim nashri stendida ham bo'lishib, Qur'oni karim nusxalarini sovg'a sifatida olishdi.
Mazkur ko'rgazmaga tashrif buyurganlar uning mutasaddilarining islomiy asarlarni tanitish va Qur'oni Karimga xizmat ko'rsatish borasidagi sa'y-harakatlarini yuqori baholadilar va minnatdorchilik bildirdi.
O'zbekiston musulmonlari idorasi xodimi
Ilyosxon domla AHMYeDOV tayyorladi
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
