Zalolat ahlining yuzi qorayadi
Bu dunyoda inson yashar ekan doimo yuzi yorug' bo'lishiga intiladi. Ayniqsa, insonning yuzi qiyomat kuni Allohning huzurida yorug' bo'lishi juda ham muhim. Mo'min-musulmon har doim duosida “Ey Alloh, ikki dunyoda yuzimni yorug' qil” deb duo qiladi va shunga muvofiq harakat qiladi.
Insonning dinda bid'at ishlarni qilishi uni zalolatga etaklaydi. Payg'ambarimiz sollallohu alayhi vasallam: "Sizlar mening va to'g'ri yo'lda yuruvchi, hidoyat topgan xulafolarimning yo'lini tutib, uni oziq tishlaringiz bilan tishlagandek mahkam ushlanglar. Dinga yangiliklar kiritishdan saqlaninglar, albatta, har qanday bid'at – zalolatdir" – deganlar (Imom Abu Dovud va Imom Termiziy rivoyati).
Islom dinida tafriqalarni yuzaga keltirish, turli xil oqimlarga bo'linish, tarafkashlik qilish kabi ishlar zalolatga olib boruvchi bid'atlardir.
Zalolat esa qiyomat kuni insonning yuzini qora bo'lishiga sababchi bo'ladi. Abdulloh ibn Umar roziyallohu anhudan rivoyat qilinishicha, Rasululloh sollallohu alayhi vasallam: "Ba'zi yuzlar yorug' va ba'zi yuzlar qorayadigan Kun (qiyomat)ni eslang..." (Oli Imron surasi, 106-oyat), degan oyatni: "Ahli sunna val-jamoat"ning yuzi yorug' bo'ladi, ahli bid'at va zalolatning yuzi qorayadi" - deb tafsir qilganlar (Imom Molik, Imom Daylamiy rivoyati).
Alloh taolo barchamizni turli xil zalolatlardan asrab, O'zining haq yo'lida bardavom qilsin!
R. Akbarov,
Qashqadaryo viloyatdagi vakillik xodimi
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati
