Axir bu salaflar yo'li emas-ku?!
Men u salafiyga mujtahid olimlar imom Abu Hanifa, Molik, Shofe'iy va Ahmad rahimahumullohning bir masala haqidagi qavllarini aytdim.
U bo'lsa:
- Siz menga bu masalada Alloh ne degan va Allohning Rasuli ne degan?, shuni ayting, dedi.
Men unga bunday dedim: Bu to'rtala imom bu masala haqidagi hukmni Tavrot yoki Injildan olishmagan. Ular aynan Qur'on va Sunnatdan olishgan. Bu masaladagi ixtiloflari, ya'ni turlicha qavl aytishlari sababi esa, oyat va hadisni turlicha fahmlashlaridir!
(Sahobalar ham bir oyat yoki hadisni turlicha fahmlashgan).
Sening bu fikring esa sathiy, faqat zohiriy e'tiborda, ko'rinishda haq bo'lsada aslida o'ta xatarli va aldamchidir…
Doktor Abdulfattoh Yofi'iy.
————
Hozirda hukmni Qur'on va Sunnatdan olamiz deya odamlarni aldayotgan, ularni ixtilofga solayotgan toifalar bor.
Ularni eshitsangiz gaplariga qoil qolasiz, ammo chuqurroq o'rgansangiz asl basharalari ochilib yolg'onlari fosh bo'lib qoladi.
Ular fikricha Imom Abu Hanifa, Molik, Shofe'iy va Ahmadlarga emas, Qur'on va Sunnatga ergashish lozim ekan.
Go'yo bu mujtahid imomlar oyat va hadisdan emas, Tavrot va Injildan hukm olishgan ekan.
Nauuzu billah! Shunaqalardan bittasi bilan bir soat bahs qildik, rosa tortishdi, oxirida esa keling endi siz kitobingizni o'qing desak, men arabcha o'qiy olmayman dedi…
Ba'zilari oyat va hadisdan olmayapti, deya dod solishadi, ammo o'zlari esa Qur'on o'qishni ham bilishmaydi…
Azizlar ko'zingizni oching. To'rtala mazhab egalari ham aynan Qur'on va sunnatdan hukm olganlar va ularning o'zlari salafi solihlardan bo'lishgan.
Hozirdagi bu toifalar esa, o'zlari va ergashgan ulamolari salaflardan emas, ammo odamlarni salaflarga ergashamiz deya aldashyapti, ha ha aldashayapti.
Ular ergashgan ibn Taymiya, ibn Abdulvahhob, Alboniy, Ibn Boz, Favzon kabi olimlar aslo salafi solihlar emas. Aksincha, eng avvali ham Rasululloh sollallohu alayhi vasallamdan 600 yil keyin yashagan.
To'rtala imom Abu Hanifa, Molik, Shofe'iy va Ahmadlar esa ayni sahobalar, tobeinlar va tabaa tobeinlar davrida yashashgan va ular aynan salafi solihlardir.
Endi oz bo'lsada tushuna oldingizmi?
Aslida salafi solihlarga aynan to'rt mazhabdan birini tutgan inson ergashgan hisoblanadi!
Ularni da'volari juda zo'r, ammo aslida yolg'on!
Aldanishni bas qiling!!!
(oralaridagi solih va aql sohiblari mustasno)
Sunnatulloh Abdulbosit
O‘zbekistonda jahon xattotlar tanlovi 26 avgustda e’lon qilinadi
O‘zbekistonda noyob Qur’on yaratish bo‘yicha jahon xattotlar tanlovi 26 avgust kuni O‘zbekistondagi Islom sivilizatsiyasi markazida e’lon qilinadi. Tanlov «Islom sivilizatsiyasi: yangi nigoh — yangi kashfiyotlar» xalqaro mediaforumi doirasida o‘tkaziladi, xabar bermoqda UzDaily.uz.
«Dunyo Qur’oni: xattotlik an’analaridan — kelajak merosi sari» loyihasini xattot va Islom sivilizatsiyasi markazi huzuridagi Xattotlik maktabi direktori Habibullo Solih taqdim etadi. Bu haqda tadbir tashkilotchisi xabar berdi.
Tanlov doirasida turli mamlakatlar va xattotlik maktablarining islomiy xattotlikdagi eng yaxshi an’analarini birlashtirgan noyob Qur’on yaratish ko‘zda tutilgan.
Tanlovning tantanali e’loni «Asrlarni birlashtiruvchi meros. Islom sivilizatsiyasining ma’naviy mazmunlari» mavzusidagi yalpi sessiyaning yakuniy qismi bo‘ladi. Sessiya 26 avgust kuni soat 09:30 dan 12:00 gacha o‘tkaziladi.
Tadbir doirasida ommaviy axborot vositalarining stereotiplar va islomofobiyani yengishdagi roliga bag‘ishlangan xalqaro muhokama ham bo‘lib o‘tadi. Unda Islom hamkorlik tashkiloti, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat tuzilmalari hamda OAV vakillari ishtirok etadi.
Forum dasturidan Qur’oniy va qo‘lyozma merosga bag‘ishlangan loyihalar ham o‘rin olgan. Ular orasida «114 Qur’on: islom olamining 114 xattotlik durdonasi», «Katta Langar Qur’oni: haqiqat va rivoyatlar» xalqaro loyihasi hamda «Sun’iy intellekt — qadimiy qo‘lyozmalarni o‘qishning raqamli kaliti» loyihasi bor.
O‘zbekistonda xattotlikni rivojlantirishga institutsional darajada ham e’tibor qaratilmoqda. Islom sivilizatsiyasi markazi huzurida Prezident Shavkat Mirziyoyev tashabbusi bilan tashkil etilgan Xattotlik maktabi faoliyat yuritmoqda. Maktabda suls, nasx, nasta’liq, ruq’a, devoniy va kufiy kabi an’anaviy yozuv uslublarini o‘rgatish rejalashtirilgan.
Xattotlik san’ati Samarqand viloyatidagi yangi Imom al-Buxoriy majmuasida ham namoyon etilgan. Majmua peshtoqlari va ayvonlari devorlari «Sahih al-Buxoriy»dan olingan hadislar bitilgan yozuvlar bilan bezatilgan. Majmua huzurida Imom Buxoriy xalqaro ilmiy-tadqiqot markazi va Hadis ilmiy maktabi ham faoliyat yuritadi.
Xalqaro mediaforumning asosiy maydoni O‘zbekistondagi Islom sivilizatsiyasi markazi bo‘ladi.
Tadbirda qariyb 50 mamlakatdan media va ekspertlar hamjamiyatining 300 ga yaqin vakili ishtirok etadi. Ular orasida mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari bor.
O‘zbekiston musulmonlari idorasi matbuot xizmati
