2 may erta tongdan Surxondaryo viloyatidagi 124 ta jome masjidida muborak Ramazon hayiti namozi o'qildi.

Prezidentimizning joriy yil 30 apreldagi “Ramazon hayitini nishonlash to'g'risida”gi qaroriga muvofiq barcha masjidlarda mo'min-musulmonlarning emin-erkin ibodat qilishi uchun zarur sharoit yaratildi.

Termiz shahridagi Hakim at-Termiziy nomli jome masjidi ham subhidamdan namozxonlar bilan govjum bo'ldi. O'zbekiston Musulmonlari idorasining viloyatdagi vakili Aliakbar Sayfuddinov qutlug' ayyom munosabati bilan yig'ilgan musulmonlarni bayram bilan tabrikladi. Osuda, obod Vatanda tinch, xotirjam ibodat qilish uchun barcha qulayliklar yaratilgani haqida atroflicha so'z yuritdi. Ma'ruzada Ramazon hayitining fazilatlari, tarixi va ma'naviy qadriyatlariga e'tibor qaratilib, bunday tinch, to'kin hayot uchun har tong shukrona aytish lozimligi ta'kidlandi. Ehtiyojmand oilalar, keksalar va bemorlarga mehr ko'rsatishning ajru-savoblari hususida fikr yuritildi.

Ramozon hayiti amallarini bajargan yurtdoshlarimiz bir-birlarini bayram bilan tabriklab, mamlakatimizga tinchlik, fayzu-baraka, sog'lik, omonlik tilab duoga qo'l ochishdi. Yaqinlari va ehtiyojmandlar, bemorlar xolidan xabar olib, hadyalar ulashishga yo'l olishdi.

Viloyatda bayram munosabati bilan saxovat tadbirlari davom etmoqda.

Holmo'min MAMATRAYIMOV, 

O'zA muxbiri