Bugun, 29 aprel kuni O‘zbekiston musulmonlari idorasi raisi, muftiy Nuriddin domla hazratlari Toshkent shahrida joylashgan “Siroj Solih” masjidida juma namozini qavm bilan birga ado etish va ma’ruza qilish uchun tashrif buyurdilar.

Juma namozidan avval, muftiy hazratlari jamoatga silai rahm haqida ma’ruza qilib, bu fazilatni Hazrati Payg‘ambarimiz hadislari asosida tushuntirib bunday dedilar:

– Rasululloh sollallohu alayhi va sallam payg‘ambarlikning ilk kunlaridanoq silai rahmga chaqirishni boshlaganlari ham ushbu ish naqadar ahamiyatga ega amal ekanini bildiradi.

Abu Umoma Bohiliy raziyallohu anhu aytadilar: Men Amr ibn Abasa raziyallohu anhudan: “Sizni nega “Islomda ilk musulmonlardan” deyishadi? – deb so‘radim. U zot bunday deb javob berdilar: “Men odamlar zalolatda ekanini ko‘rardim va butlar hech narsa emasligini bilardim. So‘ngra Makkada bir odamning xabarini eshitdim. Tuyamga minib Makkaga keldim. Qarasam, Rasululloh sallallohu alayhi vasallamni qavmi o‘rab turibdi. Yonlariga bordim va: “Siz kimsiz?” – dedim. “Payg‘ambarman”, – dedilar. “Payg‘ambar nima degani?” “Allohning elchisi”, – degani. “Sizni Alloh yubordimi?” “Ha”. “Nima uchun yubordi?” “Allohning biru borligini bildirib, Unga hech narsani sherik qilmaslik, butlarni yo‘q qilish va silai rahmni mustahkamlash uchun yubordi” dedilar.

Ushbu hadisda silai rahm payg‘ambarlikning asosiy vazifasi sifatida hamda Islom dinining asosiy g‘oyalari bilan bir o‘rinda keltirilmoqda. Demak, silai rahm o‘ziga xos bo‘lgan juda ko‘p ajrlarga ega qiluvchi ibodat hisoblanadi, – dedilar muftiy hazratlari.

Muftiy hazratlarining fayzli suhbatlaridan so‘ng juma namozi o‘qilib, muborak Ramazon kunlari qilayotgan ibodatlarimiz qabul bo‘lishi va xalqimiz orasida silai rahm yanada keng yoyilishi uchun xayrli duolar qilindi.

O‘zbekiston musulmonlari idorasi matbuot xizmati