Shayton chorlab turgan yo'llar
Inson bir manzildan ikkinchi manzilga bormoqchi bo'lar ekan, albatta, u yo'l tanlaydi. Bir manzildan ikkinchi manzilga borishda yo'llar ko'p bo'lishi mumkin. Ba'zi bir yo'l ko'zlangan manzilga to'g'ridan to'g'ri borsa, ba'zi bir yo'llar esa egri, qing'ir-qiyshiq yo'llardan iborat bo'ladi.
Mo'min-musulmon ham bu dunyoda ham yaxshilik, oxiratda ham yaxshilik keltiradigan yo'lni tanlaydi. Mo'min-musulmon yuradigan yo'l do'zaxga olib bormaydigan, Allohning roziligini topib, jannatga eltadigan yo'l bo'lishi zarur.
Payg'ambarimiz sollallohu alayhi vasallam O'z davrlarida biz mo'min-musulmonlarga “Allohning to'g'ri yo'lini ko'rsatib berganlar. Bu haqda Abdulloh ibn Mas'ud roziyallohu anhudan rivoyat qiladi: Rasululloh sollallohu alayhi vasallam qo'llari bilan bir chiziqni chizdilar va: “Bu – Allohning to'g'ri yo'li”, – dedilar. Chiziqning o'ng va chap tomonidan yana (chiziqlar chizib): “Bu yo'llar shunday yo'llarki, har birida shu yo'llarga chorlaguvchi shayton turadi”, dedilar. So'ng “Albatta, bu Mening to'g'ri yo'limdurki,unga ergashing va (turli boshqa) yo'llarga ergashmangki, sizlarni Uning yo'lidan bo'lib yuborur” oyatini o'qidilar (Imom Ahmad rivoyati).
Hozirgi kundagi musulmonlarning turli xil ixtilof qilishlari, bir-birlarini kufrda ayblashlari, fitna-fasod tarqatishlari Shayton chorlab turgan yo'llardir. Shayton chorlab turadigan yo'llardan ehtiyot bo'lib, Alloh taoloning haq yo'lida harakat qilishimiz lozim.
Alloh taolo barchamizni Shayton chorlab turgan yo'llardan saqlanib, O'zining to'g'ri yo'lida bardavom qilsin!
R, Akbarov,
O'MIning Qashqadaryo viloyatdagi vakillik xodimi
Holid Al-Fadli: O‘zbekistonning ilmiy va ma’naviy merosi butun islom olami uchun ulkan boylikdir
Kuvayt universiteti Til markazi direktori, doktor Holid Al-Fadli mamlakatimiz mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Mustaqillikning 35 yillik bayrami munosabati bilan yaqin do‘st va qardosh O‘zbekiston xalqini chin dildan samimiy muborakbod etaman. O‘zbekistonlik barcha birodarlarimizga yuksak taraqqiyot, farovonlik, tinchlik-xotirjamlik va yangi muvaffaqiyatlar tilayman.
Biz O‘zbekiston bilan azaldan mustahkam do‘stlik, o‘zaro hurmat va samimiy mehr-oqibat rishtalariga egamiz. Ushbu muborak zamindan ko‘plab buyuk va mashhur islom ulamolari yetishib chiqqan. Bu bebaho ilmiy va ma’naviy meros nafaqat O‘zbekiston, balki butun islom olami uchun ulkan boylik hisoblanadi.
Kuvayt universiteti va O‘zbekistonning yetakchi oliy ta’lim muassasalari o‘rtasida yaqin va samarali hamkorlik aloqalari yo‘lga qo‘yilganidan mamnunmiz. Ko‘p yillardan buyon o‘zbekistonlik talabalar yurtimizda, xususan, Kuvayt universitetida arab tili va madaniyatimiz bo‘yicha o‘z bilimini oshirib kelmoqda. Ular bir o‘quv yili davomida, ya’ni uch semestr mobaynida arab tilini puxta o‘rganish bilan birga, Kuvayt madaniyati, tarixi va jamiyati bilan yaqindan tanishish imkoniga ega bo‘lmoqda.
O‘zbek talabalari bilan muloqotlar davomida ularning ta’lim va ilmga juda katta qiziqish hamda ishtiyoq bilan yondashishiga alohida e’tibor qaratdim. Ular nafaqat arab tilini o‘rganish, balki boshqa xalqning madaniyati, san’ati, iqtisodiyoti va rivojlanish tendensiyalarini chuqur anglashga intilayotgani quvonarli.
Arablar va o‘zbek xalqi o‘rtasida asrlar davomida shakllangan chuqur tarixiy, ilmiy va ma’naviy aloqalar mavjud. Men ushbu do‘stona va qardoshlik rishtalari kelgusida yanada mustahkamlanib, yangi mazmun bilan boyishini istayman. Bu borada xalqaro konferensiyalar o‘tkazish, qo‘shma ilmiy tadqiqotlarni yo‘lga qo‘yish, professor-o‘qituvchilar va talabalar almashinuvini kengaytirish muhim ahamiyat kasb etadi.
Kuvaytdagi O‘zbekiston elchixonasi tomonidan bildirilayotgan tashabbus va takliflarni qo‘llab-quvvatlash, ularni amalga oshirishga yanada katta e’tibor qaratish zarur. Biz ham ikki mamlakat o‘rtasidagi ta’lim, ilm-fan va madaniy-gumanitar hamkorlikni rivojlantirish uchun yangi imkoniyatlar va istiqbolli tashabbuslarni amalga oshirishdan manfaatdormiz.
Yana bir bor, qardosh O‘zbekiston xalqini Mustaqillikning 35 yillik qutlug‘ bayrami bilan qutlayman. Alloh taolo qardosh O‘zbekiston diyoriga tinchlik-xotirjamlik, farovonlik, taraqqiyot va ulkan muvaffaqiyatlar ato etsin.
O‘zbekiston musulmonlari idorasi Matbuot xizmati
