Bugun, 11 aprel kuni peshin namozida Qo‘qon shahridagi “Degrezlik” masjidi Muftiy hazratlarining tashriflarini eshitgan minglab namozxonlar ila har qachongidan-da fayzga to‘ldi.

Dastlab Farg‘ona viloyati bosh imom-xatibi Ubaydulloh domla Abdullayev so‘z olib, shu kunlarda viloyatda katta xursandchilik bo‘layotgani, buning boisi soha rahbarlari kelganini aytib, mehmonlarni tashrif bilan qutladilar, so‘ng O‘zbekiston musulmonlari idorasi raisi, muftiy Nuriddin domla hazratlarini minbarga taklif qildi.

Muftiy hazratlari mav’izalari avvalida jomega yig‘ilgan qo‘qonlik mo‘min-musulmonlarni Ramazoni sharif bilan qutlab, iliq tilak va duolar qildilar.

Muftiy hazratlari suhbatlari asnosida Haq taoloning ne’matlariga burkangan ayni zamonda shukrni ziyoda qilishimiz lozimligi, duolar qilganimizda o‘z hojatlarimizni so‘raganda, albatta, yurt tinchligi, xalq farovonligini so‘rash lozimligini uqtirdilar.

Ma’ruza davomida Muftiy hazratlari jamoatga ayni kunlarda yurtimizdagi taniqli va voiz ulamolar, soha rahbarlari hududlardagi masjidlarda bo‘lib, mo‘min-musulmon xalqimiz diniy savodxonligini oshirilayotgani, yurtimiz va dunyodagi voqea-hodisalardan xabardor qilinayotgani, mazkur tashrifdan ham ayni maqsad ko‘zlanganini aytib o‘tdilar.

Muftiy Nuriddin domla hazratlari suhbat asnosida ro‘zaning fazilat va foydalari haqida ham ta’sirli va mazmunli mav’iza qilib, jumladan bunday dedilar:
“Alloh taolo hadisi qudsiyda: «Odam bolasining hamma amali o‘zi uchun, faqat ro‘za Men uchundir va uning mukofotini Men – O‘zim berurman. Ro‘zadorning og‘zidagi hid Alloh huzurida mushku anbar hididan ham xushbo‘yroqdir», degan» (Imom Buxoriy va Muslim rivoyat qilishgan). “Barcha ibodatlar o‘zi faqat Alloh taolo uchun bo‘lsa, u holda nega Alloh taolo ro‘zani O‘zi uchun xosladi?” degan savol barchamizda paydo bo‘lishi tabiiy. Keling ushbu hadisni sharhlagan muhaddis ulamolarimizga murojaat qilsak.

Ulamolar ushbu hadisi sharif ustida fikr yuritib, quyidagi so‘zlarni aytishadi: Qiyomat kuni mazlumlar zolimdan qasos olib, qilgan zulmi evaziga yaxshi amallarni tortib olishlari mumkin. Chunki boshqa bir hadisda: «Kishi qiyomat kuni tog‘lar kabi yaxshiliklar bilan keladi. Lekin uni so‘kkan, buni urgan yoki yana birining molini yeganligi sababli uning yaxshiligidan mazlumga olib beriladi. Hatto zolimning yaxshiligi tugab, hech narsa qolmagach, endi mazlumning gunohidan zolimga yuklanadi va zolim (gunohi ko‘payib ketgach,) do‘zaxga tashlanadi», deyilgan. Faqat ro‘za unday emas. Ro‘zani qiyomat kuni haqdorlarga ulashib berilmaydi. Alloh ro‘zani uning egasi uchun shu darajada saqlab qo‘yar ekanki, unga hatto haqdorlar ham jur’at qila olmas ekan. Shunga binoan «Odam bolasining hamma amali o‘zi uchun, faqat ro‘za Men uchundir va uning mukofotini Men – O‘zim berurman», degan». Ya’ni Odam bolasining amallari qasos sababli talafot ko‘rib, haqdorlar tortib olishi sababli kamayishi mumkin ekan. Faqat ro‘zaga daxl qila olmas ekan.

Demak, ro‘zadan boshqa amallarning savobi qay miqdorda ko‘paytirib berilishi aniq aytilgan. Bir amal uchun savob o‘n martadan to yetti yuz martagacha ko‘paytirilishi mumkin. Ammo undan ortiq bo‘lmasligi ham mumkin. Ro‘za uchun beriladigan savob esa shu darajada ko‘p bo‘ladiki, uni Alloh taolodan boshqa hech kim bilmaydi, idrok ham qila olmaydi. Ro‘zadorning amali bunchalar yuqori baholanishining sababi shuki, u taomi va shahvatini faqat Alloh taolo uchun tark qilib, ro‘za tutganidir”.

Yakunda Muftiy hazratlari Vatanimiz tinchligi va osoyishtaligi, elimiz farovonligi va baxti-iqboli, muborak Ramazon oyi barokati, fayzini so‘rab xayrli duolar qildilar.

O‘zbekiston musulmonlari idorasi Matbuot xizmati