Bugun, 31 mart kuni O'zbekiston musulmonlari idorasida Ulamolar Kengashining kengaytirilgan yig'ilishi bo'lib o'tdi. Unda Qoraqalpog'iston musulmonlari qoziyoti qozisi, viloyatlar va Toshkent shahar bosh imom-xatiblari, diniy ta'lim muassasalari hamda ilmiy-markazlar rahbarlari, taniqli ulamolar va imom-domlalar ishtirok etdi. Hududlardan Ulamolar Kengashi a'zolari ZOOM platformasi orqali onlayn tarzda qatnashdilar.
Majlis Qur'oni karim tilovati va ezgu duolar ila boshlandi.

Yig'ilishda O'zbekiston musulmonlari idorasi raisi, muftiy Nuriddin domla Holiqnazarov hazratlari Ramazon oyini yuqori saviyada o'tkazish uchun amalga oshirilgan ishlar va ulug' oyda bajarilishi lozim bo'lgan muhim vazifalarga alohida to'xtalib o'tdilar. Hususan, mo'min-musulmonlar ibodat qilishi uchun masjidlarda qulay shart-sharoitlar tashkil etish, xatmi Qur'onlarni puxta tayyorgarlik bilan o'tkazish, iftorlik o'tkazishda isrofga yo'l qo'ymaslik, muborak oy fazilatlari haqida imom-xatiblar tomonidan muntazam OAVda targ'ibot ishlari olib borishni ta'kidlanib, qut-baraka oyini yuqori saviyada o'tkazish borasida bir qator tavsiyalarni berdilar.

Muftiy hazratlari so'zlarida davom etib, Ramazon oyining ilk oqshomida diyorimizning 2083 ta masjidida taroveh namozlari boshlanishi, oy davomida 1520 dan ortiq jomeda xatmi Qur'onlar amalga oshirilishini bildirdilar.
O'zbekiston musulmonlari idorasi raisining birinchi o'rinbosari Homidjon domla Ishmatbekov so'zga chiqib, Islom dini ta'limotlarida muborak Ramazon oyi va hayitining birinchi kunini belgilashda, Hazrati Payg'ambarimiz Muhammad sollallohu alayhi vasallamning “Yangi oyni ko'rib ro'za tutinglar va yangi oyni ko'rib hayit qilinglar”, degan hadisi shariflari asos qilib olinganini izohladi.

Homidjon domla Ishmatbekov xorijdagi nufuzli astronomiya markazlarining ma'lumoti va diniy soha mutaxassislari kuzatishlariga asosan, yangi oy hiloli 2022 yil 1 aprel' kuni tug'ilishi va shu kuni dunyoning bir qancha mamlakatlarida yangi hilolni ko'rinishini bildirdi. Hanafiy mazhabiga ko'ra, dunyoning qaysi erida yangi hilol ko'ringani ma'lum bo'lsa, shu hilol e'tiborga olinishi, shunga muvofiq, diyorimizda 2022 yilda Ramazon oyining birinchi kuni 2 aprel', shanba kuniga to'g'ri kelishi haqida qaror qabul qilish taklifini taqdim etdi.

Shuningdek, O'zbekiston, Qozog'iston hamda Qirg'iziston ulamolari kuzatishlari natijasida ham Ramazon oyining birinchi kunini 2 aprel' – shanba kuniga to'g'ri kelishi haqida yakdil fikrga kelishganlarini bildirdi.
Ulamolar Kengashi a'zolari diyorimizda joriy yilda Ramazon oyining birinchi kuni shu yil 2 aprel', shanba kuniga to'g'ri kelishi haqidagi qaror qabul qilish taklifini qo'llab-quvvatladilar.

Yig'ilishda so'zga chiqqan notiqlar Ramazon oyi diyorimizda diniy-ma'rifiy sohada ulkan o'zgarishlar bo'layotgan bir davrda o'tayotgani uchun doimo shukrona qilish, bunday tinch-osoyishta kunlar haqida keng jamoatchilik orasida imom-xatiblar tomonidan targ'ibot ishlari olib borish, muborak Ramazon oyini munosib kutib olish va Islom dini tartib-qoidalari asosida oyni kuzatish bo'yicha ishchi guruh tuzilgani, taniqli ulamolar va malakali mutaxassislardan iborat ushbu ishchi guruh Ramazon oyi kirishini astronomik tahlillar asosida kuzatib borayotganlari va uning natijalarini Ulamolar Kengashiga havola etganlari, shuningdek, mazkur yo'nalishda 14 davlat fatvo hay'atlari bilan muloqotlar olib borilganiga alohida urg'u qaratildi.

Shuningdek, so'zga chiqqanlar muborak Ramazon oyi qadimdan yurtimizda mehr-oqibat, xayr-saxovat va shukronalik kayfiyatida o'tkazilishi, xalqimiz asrlar davomida ezgulik va saxovat oyi sifatida nishonlab kelingani, Ramazon oyi joriy yilda ham butun dunyoda koronavirus infektsiyasi tarqalishi oqibatida yuzaga kelgan murakkab epidemiologik vaziyat davom etayotgan davrga to'g'ri kelayotgani, shunga ko'ra, ushbu oyni munosib o'tkazish uchun obodonlashtirish, tozalik ishlari bilan bir qatorda, pandemiya tufayli sanitariya qoidalari rioya etgan holda o'tkazish, bu vaziyat barchadan, ayniqsa, diniy soha xodimlari, imom-xatiblardan yanada sergak bo'lish, mas'uliyatni yanada oshirishni, diniy soha xodimlari ushbu ishlarda barcha uchun o'rnak, masjidlar va diniy tashkilotlar hududlari esa namuna bo'lishi talab etilishini ta'kidladilar.
Yig'ilish yakunida tegishli qarorlar qabul qilindi.

O'zbekiston musulmonlari idorasi Matbuot xizmati