HUShHABAR: OLIM IMOMLAR SAFI KYeNGAYMOQDA
So'nggi yillarda mamlakatimizda diniy-ma'rifiy sohaga qaratilayotgan alohida e'tibor tufayli imom-xatiblar o'rtasida ilmiy ish qilib, olimlik unvonini olayotganlar soni ko'paymoqda. Bu, albatta, quvonarli holdir.
Bugun Toshkent shahar Yunusobod tumani "Minor" jome masjidi imom-xatibi Rahmatulloh domla Sayfuddinov O'zbekiston xalqaro islom akademiyasi Ilmiy darajalar beruvchi ilmiy Kengash a'zolari huzurida Islomshunoslik fanlari bo'yicha falsafa doktori (PhD) ilmiy darajasini olish uchun «"Sahihul Buxoriy"da ijtimoiy-axloqiy hadislarning yoritilishi» mavzusida yozgan ilmiy ishini muvaffaqiyatli himoya qildi.
Ilmiy ish, haqiqatan, juda dolzarb va ahamiyatlidir. Chunki bugungi axborot makonida yoshlar tarbiyasiga befarq qarab bo'lmaydi.
Dr. Rahmatulloh domla Sayfuddinov ilmiy ishi himoyasida qatnashganlarning savollariga javob bera turib, har bir ota-ona juda oson va sodda tarzda o'z farzandlariga hadislarni o'rgatib, uqtirib borishlari kerak. Masalan, suv ichayotgan bolaga suvni o'tirib ichish sunnat ekanini, kiyim kiyishda o'ng tomondan boshlashni Nabiy alayhissalom tavsiya qilganlarini bolalarimizning ongu shuuriga quyib borsak, muborak hadislarni tinglab ulg'aygan bola odobli-axloqli va ilmli bo'ladi. Eng muhimi, ular turli aqidaparast, radikal va adashgan oqimlar ta'siriga tushib qolmaydi.
Olimlarning ta'kidlashlaricha, Movarounnahr zaminidan 7 mingdan ziyod buyuk mutafakkir va qomusiy allomalar etishib chiqqan. Bir zamindan ilf-fanning turli sohasida shuncha ko'p ulamoning etishib chiqqaniga omillar ko'p. Ulardan eng asosiysi odob-axloqdir.
Arab sayyohi Ibn Battuta o'zining “Sayohatnoma” asarida “O'zbek ahli axloqda mukarramdir” degan so'zlariga e'tibor qaratsak, Movarounnahr, xususan, O'zbekiston zaminidan juda ko'p qomusiy allomalar, buyuk mutafakkirlar etishib chiqqanining boisini anglaymiz.
Shu nuqtai nazardan qaraganda, Rahmatulloh domlaning ilmiy ishlari ahamiyati va qamrovi naqadar keng ekani namoyon bo'ladi.
Fursatdan foydalanib, Dr. Rahmatulloh domla Sayfuddinovni ilmiy unvon bilan samimiy muborakbod etamiz.
Bu ilmiy ish yurtimiz olimlariga, imom-xatiblarga, talabalarga, ota-onalarga va barcha mo'min-musulmonlarga birday manfaatli bo'lsin!
O'zbekiston musulmonlari idorasi
Toshkent shahar vakilligi
Matbuot xizmati
O‘zbekiston turistik kompaniyalari Ar-Riyozdagi xalqaro ko‘rgazmada ishtirok etdi
Saudiya Arabistoni poytaxtida “WTM Spotlight Riyadh 2026” xalqaro turistik ko‘rgazmasi bo‘lib o‘tdi. Unda O‘zbekiston turizm industriyasi vakillari ishtirok etdi, deb xabar bermoqda “Dunyo” AA.
Mamlakatimiz turistik salohiyatini «Asialuxe Travel», «Zamin DMC» va «Bazar Travel» kompaniyalari namoyish etdi. Ular ko‘rgazmaning ishbilarmonlik dasturida faol ishtirok etib, Saudiya Arabistoni hamda boshqa xorijiy davlatlar turizm sohasi vakillari bilan bir qator samarali uchrashuvlar o‘tkazdilar.
“WTM Spotlight Riyadh” Saudiya Arabistoni turizm bozorining xalqaro hamkorlar bilan o‘zaro aloqalari uchun asosiy professional maydonlardan biriga aylandi. Ko‘rgazma turoperatorlik biznesi, qabul qiluvchi kompaniyalar, mehmonxona sektori, aviatsiya tarmog‘i, turistik texnologiyalar va industriyaning boshqa yo‘nalishlari vakillarini birlashtirdi. Tadbirda mintaqaviy va xalqaro tashrif buyuruvchilar, 450 dan ortiq eksponentlar hamda 30 dan ortiq mamlakat vakillari qatnashdi.
Uch kun davomida o‘zbekistonlik kompaniyalar vakillari saudiyalik turoperatorlar, turistik agentliklar va bozorning boshqa ishtirokchilari bilan muzokaralar o‘tkazdilar. Muloqotlarda sheriklik dasturlarini rivojlantirish, Saudiya Arabistonidan O‘zbekistonga sayyohlar oqimini oshirish hamda yangi qo‘shma turistik mahsulotlarni shakllantirish imkoniyatlari muhokama qilindi.
O‘zbekistonni madaniy-ma’rifiy, oilaviy, premium va individual turizm uchun jozibador yo‘nalish sifatida targ‘ib qilishga alohida e’tibor qaratildi. Saudiyalik hamkorlarga Samarqand, Buxoro, Xiva, Toshkent va mamlakatimizning boshqa hududlarining turistik imkoniyatlari, Buyuk ipak yo‘lining tarixiy merosi, zamonaviy mehmonxona infratuzilmasi, milliy taomlar hamda individual va guruhli turistik dasturlarni tashkil etish imkoniyatlari namoyish etildi.
O‘zbekiston turizm tarmog‘i vakillari, shuningdek, saudiyalik hamkorlar bilan sayyohlarni kutib olishni tashkil etish, Ko‘rfaz mamlakatlaridan keluvchi sayohatchilarning afzalliklarini hisobga olgan holda ixtisoslashtirilgan yo‘nalishlarni ishlab chiqish hamda Saudiya Arabistoni bozorida O‘zbekistonning turistik salohiyatini yanada targ‘ib qilish masalalarini muhokama qildilar.
O‘zbek turistik kompaniyalarining “WTM Spotlight Riyadh 2026” ko‘rgazmasidagi ishtiroki podshohlik turistik biznesi vakillari bilan bevosita aloqalarni kengaytirish va hamkorlikning yangi yo‘nalishlarini izlash uchun qo‘shimcha imkoniyat bo‘ldi.
O‘zbekiston musulmonlari idorasi Matbuot xizmati
