Shu kunlarda muftiy Nuriddin domla hazratlari Qoraqalpog‘iston Respublikasining bir qancha tumanlarida bo‘lib, masjidlarda namozxonlarga diniy-ma’rifiy suhbatlar qilib bermoqdalar. Bunday manfaatli suhbatlardan qoraqalpoq ahli g‘oyat mamnun bo‘lib, muftiy hazratlariga o‘z minnatdorligini bildirmoqdalar.
Ana shunday go‘zal suhbatlardan biri 23 fevral kuni Tahiyatosh tumanidagi “Sariq Eshon” jome masjidida davom etdi.
Unda muftiy Nuriddin domla hazratlari xufton namozidan so‘ng jamoatga Allohga maqbul eng yaxshi amallar haqida mav’iza qilib, mavzu doirasidagi hadislardan o‘qib, uni sharhlab shunday dedilar:
– Jobir roziyallohu anhu rivoyat qilgan hadisda odamlarning ichida Allohga suyuklisi o‘zgalarga foydasi, manfaati yetadigani, eng maqbul amali esa bir kishini qalbiga xursandchilik kirgizadigani, bir musulmonni dunyodagi qiyinchiligini, mashaqqatini ketkizadigani, yoki qarzdorning qarzini uzib qo‘yadigani, shu bilan birga qorni och odamni to‘ydiradigani deyilgan. Bugun biz bularning qay biriga amal qilyapmiz? Hozir shunaqa bo‘lib qoldiki, birortasi qarz so‘rasa bermaymiz. Yordam qilgimiz kelmaydi. Muhtojroq odamni ko‘rib qolsak, biror narsa so‘ramasin deb qochamiz. Bu chin mo‘minning ishimi? Qo‘lingizdan kelsa qarzdor odamni mushkulini oson qiling, muhtoj odamning hojatini chiqaring, bu kabi amallar Masjidi Nabaviyda bir oy e’tikof o‘tirgandan afzal deyilgan hadislarda. Haqiqiy, chin mo‘min bo‘lmoqchimizmi, unda mana shu amallarga e’tiborli bo‘lishimiz lozim.
Shuningdek, muftiy hazratlari haqiqiy mo‘min qanday duo qilishi haqida so‘z yuritib, faqat bu dunyoni so‘rayvermasdan oxirat yaxshiligini so‘rashni ham ta’kidladilar.
Dolzarb mavzuda qilingan ma’ruza yig‘ilganlarda katta taassurot qoldirishi barobarida o‘ziga tegishli manfaat ham olishlariga sabab bo‘ldi. Jamoat muftiy hazratlarining tashriflaridan behad mamnun bo‘lib, go‘zal suhbatlaridan ruhiy ozuqa oldilar.
Ma’rifiy suhbat so‘ngida jamoat va xalqimiz farovonligi yo‘liga ezgu duolar qilindi.

O‘zbekiston musulmonlari idorasi Matbuot xizmati