Allohga shukrki, co'nggi yillarda mamlakatimizning turli hududlarida aholi ehtiyojlaridan kelib chiqib, xalqimizning emin-erkin ibodat qilishlari uchun barcha shart-sharoitlarga ega jomelar bunyod etilmoqda.

Ana shunday muborak maskanlardan ikkitasi Qoraqalpog'iston o'lkasining Nukus shahrida ajratilgan er maydonlarida barpo etilmoqda.

O'zbekiston musulmonlari idorasi raisi, muftiy Nuriddin domla hazratlari Orolbo'yi mintqasiga tashriflari chog'ida Nukus shahrida “Samanbay” va “Qumovul” mahallalarida hashar yo'li bilan qurilayotgan masjidlardagi ish jarayonlari bilan yaqindan tanishdilar. Muftiy hazratlari qurilish va bunyodkorlik jarayonlarini ko'zdan kechirib, o'z tavsiyalarini ham berib o'tdilar.

Kelgusida mazkur inshootlarning ichki tomoni an'anaviy naqshlar bilan bezatiladi. Ularda barcha qulayliklarga ega kutubxona, ma'muriy bino va zamonaviy tahoratxona barpo etiladi.

Tashrif yakunida muftiy Nuriddin domla hazratlari mahalliy aholi bilan uchrashib, qoraqalpoq eli va yurtimiz haqqiga xayrli duolar qildilar.

O'zbekiston musulmonlari idorasi
Matbuot xizmati