Ayni kunlarda muftiy Nuriddin domla hazratlarining Qoraqalpog'iston diyoriga tashriflari davom etmoqda. Safar asnosida ma'rifiy suhbatlar tashkil etish barobarida qoraqalpoq ahlini yurtdagi yangilanishlar mohiyati haqida xabardor qilish, ularning dardu tashvishlariga quloq tutish, taklif va murojaatlarini o'rganish ishlari amalga oshirilmoqda.

Orolbo'yi mintaqasini har jihatdan rivojlantirish bo'yicha hukumatimiz tomonidan amaliy ishlar bajarilmoqda. Ayniqsa, aholini ish bilan ta'minlash, oilalarni kambag'allikdan olib chiqish, yordamga muhtoj kishilarga ko'mak berish va atrof-muhitni o'nglashga qaratilgan manzilli dasturlar ijro qilinmoqda.

Muftiy hazratlarining ushbu mintaqaga ishchi guruhlar qatorida uyushtirgan safarlari mobaynida u erdagi aholi bilan yuzma-yuz muloqotlar qilish, olib borilayotgan o'zgarishlarni qo'llab-quvvatlash bilan cheklanib qolmay, Davlatimiz Rahbari tomonidan belgilangan muhim vazifalarni ado etishda soha xodimlarining munosib hissasini ta'minlashga undamoqdalar.

Ushbu so'zlarning amaliy ifodasi sifatida Muftiy hazratlari Diniy idora hisobidan Qoraqalpog'iston musulmonlari qoziyotini ma'naviy-ma'rifiy sohadagi faoliyatini qo'llab-quvvatlash uchun 100 million so'm xayriya sifatida ajratildi. Mazkur moliyaviy yordam mintaqadagi masjid-madrasalar faoliyatini yaxshilash va diniy soha xodimlarini qo'llab-quvvatlash kabilarga yo'naltiriladi.

Ma'lumki, Qoraqalpog'istonda 61 ta jome masjid faoliyat yuritadi. Ularda 16 nafar oliy ma'lumotli, 45 nafar o'rta maxsus imom-xatiblar mehnat qiladi. Shuningdek, mazkur masjidlarda 5 nafar oliy ma'lumotli, 63 nafar o'rta maxsus imom noiblari ham xizmat ko'rsatmoqda.

O'tgan yili 8 nafar imom-xatib Toshkent islom instituti huzuridagi modul' ta'lim tizimiga oliy ma'lumotli qilish uchun o'qishga qabul qilindi. Bundan tashqari, 2 nafar imom-xatib Toshkent islom instituti sirtqi bo'limini muvaffaqiyatli tamomladi.

Qoraqalpog'iston musulmonlari qoziyoti tasarrufidagi diniy tashkilotlar va soha xodimlarini har jihatdan qo'llab-quvvatlash ishlarini bundan buyon ham davom ettiriladi.

O'zbekiston musulmonlari idorasi Matbuot xizmati