Keyingi yillarda Davlatimiz Rahbarining mamlakatimizda xalq bilan muloqot qilish bo'yicha yangi tizimga asos solganlari o'zining amaliy va ijobiy natijalarini berayotir. Bu yo'nalishda diniy soha rahbarlari, bir guruh ulamolar xalq bilan muloqot qilib, odamlarning dardu tashvishlari bilan yashash va ishlash yo'lidagi faoliyatlariga o'zgacha mazmun, ko'tarinki ruh olib kirib, bunday ishlarni yangi bosqichga olib chiqmoqdalar.

Shu kunlarda O'zbekiston musulmonlari idorasi raisi, muftiy Nuriddin domla hazratlari Qoraqalpog'iston Respublikasiga tashrif buyurdilar. Hazrat safar davomida keng xalq ommasi bilan ma'naviy-ma'rifiy uchrashuvlar o'tkazib, olis va chekka hududlardagi aholi vakillari bilan yuzma-yuz muloqot qilmoqdalar.

Bugun ana shunday manfaatli muloqot Qoraqalpog'iston Respublikasi Qorauzyak tumani «Qorauzyak» ovul fuqarolari yig'ini faollari bilan bo'lib o'tdi.

Muftiy hazratlari aholi bilan uchrashib, yurtimizda bo'layotgan islohotlar va o'zgarishlar haqida so'z yuritib, bularning barchasi inson qadrini ulug'lash, xalq roziligi uchun qilinayotganini qayd etdilar. Shu bilan birga yig'ilganlarni diniy sohada bo'layotgan yangiliklar bilan tanishtirib, aholining emin-erkin ibodat qilishlari uchun barcha shart-sharoitlar yaratilayotganini ta'kidladilar.

Muloqot yakunida muftiy hazratlari jamoat va yurtimiz ravnaqi uchun xayrli duolar qildilar.

Tashrif davom etmoqda.

O'zbekiston musulmonlari idorasi Matbuot xizmati