Konstitutsiya kuniga bag'ishlangan uchrashuv
Nukus shahridagi Muhammad ibn Ahmad al-Beruniy o'rta maxsus islom bilim yurtida O'zbekiston Respublikasi Konstitutsiyasi qabul qilinganligining 31 yilligi munosabati bilan uchrashuv bo'lib o'tdi.
Uchrashuvda Qoraqalpog'iston Respublikasi Adliya vazirligi vakillari, bilim yurti o'qituvchilari, xodimlari, talabalari ishtirok etdi.
Uchrashuvda Muhammad ibn Ahmad al-Beruniy o'rta maxsus islom bilim yurti mudiri Jalalatdin Abdurazakov, Yoshlar bilan ishlash, ma'naviyat va ma'rifat bo'limi boshlig'i Adilbay Yerejepov, Qoraqalpog'iston Respublikasi Adliya vazirligining nodavlat notijorat tashkilotlari bo'limi boshlig'i Azat Bekjanov va boshqalar xalqaro huquqning umume'tirof etilgan printsip va normalariga asoslangan yangi tahrirdagi O'zbekiston Respublikasi Konstitutsiyasi avvalo, inson huquq va erkinliklarini ta'minlash, demokratiya, erkinlik va tenglik, ijtimoiy adolat va birdamlik g'oyalarini mustahkamlash, fuqarolarning munosib hayot kechirishini, millatlararo va konfessiyalararo totuvlikni, ko'p millatli mamlakatimizning farovonligini va gullab-yashnashini ta'minlashga xizmat qilishi bilan ahamiyatli hujjat ekanini ta'kidladi.
O'zbekiston Respublikasi Prezidentining 2023 yil 16 noyabrdagi farmoyishiga binoan, bu yilgi Konstitutsiya bayrami “Konstitutsiya – xalqchil davlat, barqaror taraqqiyot va farovon hayot asosi!” degan hayotiy shior ostida respublikamiz bo'ylab keng nishonlanmoqda.
Darhaqiqat, bosh qomusimiz mazmun-mohiyatida inson, uning hayoti, erkinligi, sha'ni va qadr-qimmati oliy qadriyat hisoblanadi, konstitutsiyamiz insonparvar demokratik davlat, ochiq va adolatli jamiyatni barpo etish, O'zbekistonning jahon hamjamiyati, eng avvalo, qo'shni davlatlar bilan do'stona munosabatlarini hamkorlik, o'zaro qo'llab-quvvatlash, tinchlik va totuvlik asosida mustahkamlash hamda rivojlantirish g'oyalari bilan sug'orilgan.
Jumladan, Konstitutsiyamizning 13-moddasida O'zbekiston Respublikasida demokratiya umuminsoniy printsiplarga asoslanadi, ularga ko'ra inson, uning hayoti, erkinligi, sha'ni, qadr-qimmati va boshqa ajralmas huquqlari oliy qadriyat hisoblanishi, demokratik huquq va erkinliklar Konstitutsiya va qonunlar bilan himoya qilinishi belgilab qo'yilgan bo'lsa, 33-moddasida har kim fikrlash, so'z va e'tiqod erkinligi huquqiga egaligi, 35-moddasida esa hamma uchun vijdon erkinligi kafolatlanishi alohida belgilab qo'yilgan.
Uchrashuvda yangi tahrirdagi Konstitutsiyamizning mazmun-mohiyati va ahamiyati, kiritilgan o'zgarishlar haqida batafsil ma'lumot berildi. Muhammad ibn Ahmad al-Beruniy o'rta maxsus islom bilim yurti talabalari o'zlarini qiziqtirgan savollarga javob oldi.
O‘zbekiston turistik kompaniyalari Ar-Riyozdagi xalqaro ko‘rgazmada ishtirok etdi
Saudiya Arabistoni poytaxtida “WTM Spotlight Riyadh 2026” xalqaro turistik ko‘rgazmasi bo‘lib o‘tdi. Unda O‘zbekiston turizm industriyasi vakillari ishtirok etdi, deb xabar bermoqda “Dunyo” AA.
Mamlakatimiz turistik salohiyatini «Asialuxe Travel», «Zamin DMC» va «Bazar Travel» kompaniyalari namoyish etdi. Ular ko‘rgazmaning ishbilarmonlik dasturida faol ishtirok etib, Saudiya Arabistoni hamda boshqa xorijiy davlatlar turizm sohasi vakillari bilan bir qator samarali uchrashuvlar o‘tkazdilar.
“WTM Spotlight Riyadh” Saudiya Arabistoni turizm bozorining xalqaro hamkorlar bilan o‘zaro aloqalari uchun asosiy professional maydonlardan biriga aylandi. Ko‘rgazma turoperatorlik biznesi, qabul qiluvchi kompaniyalar, mehmonxona sektori, aviatsiya tarmog‘i, turistik texnologiyalar va industriyaning boshqa yo‘nalishlari vakillarini birlashtirdi. Tadbirda mintaqaviy va xalqaro tashrif buyuruvchilar, 450 dan ortiq eksponentlar hamda 30 dan ortiq mamlakat vakillari qatnashdi.
Uch kun davomida o‘zbekistonlik kompaniyalar vakillari saudiyalik turoperatorlar, turistik agentliklar va bozorning boshqa ishtirokchilari bilan muzokaralar o‘tkazdilar. Muloqotlarda sheriklik dasturlarini rivojlantirish, Saudiya Arabistonidan O‘zbekistonga sayyohlar oqimini oshirish hamda yangi qo‘shma turistik mahsulotlarni shakllantirish imkoniyatlari muhokama qilindi.
O‘zbekistonni madaniy-ma’rifiy, oilaviy, premium va individual turizm uchun jozibador yo‘nalish sifatida targ‘ib qilishga alohida e’tibor qaratildi. Saudiyalik hamkorlarga Samarqand, Buxoro, Xiva, Toshkent va mamlakatimizning boshqa hududlarining turistik imkoniyatlari, Buyuk ipak yo‘lining tarixiy merosi, zamonaviy mehmonxona infratuzilmasi, milliy taomlar hamda individual va guruhli turistik dasturlarni tashkil etish imkoniyatlari namoyish etildi.
O‘zbekiston turizm tarmog‘i vakillari, shuningdek, saudiyalik hamkorlar bilan sayyohlarni kutib olishni tashkil etish, Ko‘rfaz mamlakatlaridan keluvchi sayohatchilarning afzalliklarini hisobga olgan holda ixtisoslashtirilgan yo‘nalishlarni ishlab chiqish hamda Saudiya Arabistoni bozorida O‘zbekistonning turistik salohiyatini yanada targ‘ib qilish masalalarini muhokama qildilar.
O‘zbek turistik kompaniyalarining “WTM Spotlight Riyadh 2026” ko‘rgazmasidagi ishtiroki podshohlik turistik biznesi vakillari bilan bevosita aloqalarni kengaytirish va hamkorlikning yangi yo‘nalishlarini izlash uchun qo‘shimcha imkoniyat bo‘ldi.
O‘zbekiston musulmonlari idorasi Matbuot xizmati
