Kishining vafodorligi Vatan uchun qayg'urishidan bilinur!
Vatan tushunchasi juda ham keng tushuncha bo'lib, uni bir so'z bilan ifodalab bo'lmaydi. Vatan bu bizni o'z bag'riga olgan makon. Vatan u shunday bir maskanki, unda nafslar orom oladi. U bir bepoyon zaminki, unda dunyoga kelamiz, unda yashaymiz, oila quramiz, maqsad sari intilamiz va unda vafot etamiz va unga dafn qilinamiz. Dinimiz insonlarni vatanparvar bo'lib, yurtini sevishga, uni himoya qilib, obod etishga chaqiradi. Yurtini sevgan o'zini sevibdi. Mana shunday yurtini sevib ardoqlagan, uni sarhadlarini himoya qilish-la sharaf tuygan soha vakillaridan biri bu harbiylardir.
Hakimlar aytadilar: «Kishining vafodorligi uning o'z vatani uchun qayg'urishidan, birodarlarini sog'inishidan va umrining zoye ketkazgan lahzalariga o'kinib yashashidan bilinadi».
Alixon to'ra Sog'uniy esa : «Ona Vatanini sevish har bir kishining qalbida g'ayrat va shijoat uyg'otadi», deganlar. Biz mana shunday shijoatli va yurtini sevgan har bir yurtdoshimizga kirib kelayotgan vatan “Vatan himoyachilari kuni” muborak bo'lsin, deymiz.
Vatanini sevgan inson Vatan tushunchasini ham himoya qiladi. Dinimiz ta'limotiga ko'ra, vatanni himoya qilgan insonga ajr va savoblar berlishi aytilgan. Ibn Abbos roziyallohu anhudan rivoyat qilingan hadisda Payg'ambarimiz alayhissalom; «Ikki ko'z egasini do'zax otashi kuydirmas: biri bu – Allohdan qo'rqib yig'lagan, ikkinchisi – Alloh yo'lida poyloqchilik qilib uxlamagan kishini», – deb aytganlar (Termiziy rivoyati).
Yana bir hadisi sharifda Rasululloh sallolohu alayhi vasallam shunday marhamat qilganlar: «Alloh taolo roziligi yo'lida bir kun chegara hududida posbonlik qilish bir oy kechalari (nafl) ibodat qilib, kunduzlari nafl ro'za tutishdan afzaldir». Darhaqiqat vatanni himoya qilmoq uni sarhadlarini yovlardan asramoq ulug' jasorat va sharaf bo'lish bilan birga, yuksak ibodat hamdir.
Buyuk ajdodlarimizdan biri, tasuvvufda Kubroviya ta'limotining asoschisi Najmiddin Kubro mo'g'ullar bosqinidan xabar topgach, birinchilardan bo'lib Vatan himoyasiga otlandi. Mo'g'ul hukmdorlari Najmiddin Kubroning shijoati, xalq orasidagi obro'-e'tibori, himoyadagi harakatlarini ko'rib, o'z yaqinlari va safdoshlaridan istaganlari olib o'zi ixtiyor qilgan tarafga ketishni taklif qiladi.
Vatan ozodligini o'z hayotidan ustun ko'rgan Najmiddin Kubro bosqinchilarga qarshi tug' ko'tarib jangga kiradi va lashkarni olg'a boshlab borayotgan holatda shahid bo'ladi. U zot tug'ni shunchalar jon-jahdi bilan ushlagan ediki, dushman askarlari tug'ni uning qo'llarini kesgachgina olishga muvaffaq bo'ladi.
Aziz vatan posbonlari! Barchangizni yaqinlashib kelayotgan 14-Yanvar' — “Vatan himoyachilari kuni” bilan yana bir bor muborakbod etamiz!
Alloh taolo yurtimiz sarhadlarini sergaklik bilan qo'riqlayotgan, yurtdoshlarimizning tinchlik va xotirjaligi uchun tunu-kun xizmat qilayotgan siz azizlarni o'z panohida asrab, aziz diyorimiz osmonini musaffo, halqimiz hayotini bunda-da farovon aylasin.
«Yahyoxon To'ra»
jome' masjidi imom xatibi:
Nurulloxon Domla Jamalov
Qariyb 50 mamlakat jurnalistlari yangi Imom Buxoriy majmuasi va Samarqandning asosiy yodgorliklarini ziyorat qiladi
«Islom sivilizatsiyasi: yangi nigoh — yangi kashfiyotlar» Xalqaro mediaforumi ishtirokchilari 27 avgust kuni Samarqandga yo‘l oladi. Ular yangidan bunyod etilgan Imom Buxoriy yodgorlik majmuasi, Imom Buxoriy xalqaro ilmiy-tadqiqot markazi hamda Imom Buxoriy nomidagi Innovatsion muzey bilan tanishadi. Kunning ikkinchi yarmida esa ishtirokchilar uchun shaharning tarixiy-madaniy meros obyektlari, jumladan, YUNЕSKOning Jahon merosi ro‘yxatiga kiritilgan yodgorliklar bo‘ylab maxsus dastur tashkil etiladi, xabar bermoqda iccu.uz.
Yodgorlik majmuasi Samarqand viloyati Payariq tumanida, buyuk muhaddis va ilohiyotshunos Muhammad al-Buxoriyning (810–870) dafn etilgan joyida joylashgan. U «Sahihi Buxoriy» to‘plami muallifi bo‘lib, mazkur asar sunniy islomdagi eng mo‘tabar hadis to‘plamlaridan biri hisoblanadi.
Keng ko‘lamli rekonstruksiyadan so‘ng majmua 2026 yil bahorida ziyoratchilar uchun qayta ochildi. Uning umumiy hududi 45 gektarni tashkil etadi. Bu yerda 10 ming kishilik masjid, ma’muriy va xizmat ko‘rsatish binolari, 154 ustunli ayvon, 14 ta moviy gumbaz va balandligi 75 metr bo‘lgan to‘rtta minora barpo etilgan. Rekonstruksiyadan so‘ng majmuaning kunlik qabul qilish quvvati 12 ming nafardan 65 ming nafargacha oshdi.
Majmuaning markaziy qismlaridan biri — to‘qqizta pavilondan iborat yangi Imom Buxoriy Innovatsion muzeyidir. Ekspozitsiya allomaning hayoti, hadisshunoslik tarixi va uning ilmiy merosiga bag‘ishlangan. Shuningdek, muzeyda Qur’onda zikr etilgan payg‘ambarlar, Payg‘ambarimiz Muhammad sollallohu alayhi vasallamning Makka va Madinadagi hayoti hamda yozma hadis to‘plamlarining shakllanish tarixi haqida ma’lumotlar berilgan.
Majmua yaqinida Imom Buxoriy xalqaro ilmiy-tadqiqot markazi ham faoliyat yuritadi. Markaz islom ilmiy va qo‘lyozma merosini, jumladan, Markaziy Osiyoning o‘rta asr olimlari asarlarini o‘rganish, ilmiy tadqiqotlar va tarjimalar tayyorlash, shuningdek, xalqaro ilmiy almashinuvni rivojlantirish bilan shug‘ullanadi.
Majmuaga tashrifdan so‘ng forum ishtirokchilari tarixiy Samarqand bilan tanishadi. Shaharning asosiy me’moriy yodgorliklari qatoriga Registon, Bibixonim masjidi, Shohi Zinda majmuasi va Go‘ri Amir maqbarasi kiradi. YUNЕSKO ushbu to‘rt obyektni 2001 yilda «Samarqand — madaniyatlar chorrahasi» nomi bilan Jahon merosi ro‘yxatiga kiritilgan tarixiy shaharning asosiy yodgorliklari sifatida e’tirof etadi.
Samarqand bosqichi 24–28 avgust kunlari Toshkent va Samarqand shaharlarida bo‘lib o‘tadigan «Islom sivilizatsiyasi: yangi nigoh — yangi kashfiyotlar» Xalqaro mediaforumi dasturining bir qismi bo‘ladi.
Press-slujba Upravleniya musulman Uzbekistana
- «
- »