28 Октябр, 2026, 17 Жумадул аввал, 1448
28 Октябр, 2026, 17 Жумадул аввал, 1448
Расулуллоҳ соллаллоҳу алайҳи васаллам сафардан қайтсалар аввало масжидга кирардилар. Бу ҳақда Абу Саълаба розияллоҳу анҳудан ривоят қилинади: “Расулуллоҳ соллаллоҳу алайҳи васаллам сафардан қайтганларида олдин масжидга кирар, икки ракат намоз ўқир, сўнг қизлари Фотимага учрар, шундан кейингина уйларига кетар эдилар” (Имом Табароний ривояти).
Каъб ибн Молик розияллоҳу анҳу айтади: “Расулуллоҳ соллаллоҳу алайҳи васаллам сафардан фақатгина кундузи тонг вақтида келардилар. Сафардан келсалар, масжиддан бошлардилар ва унда икки ракат нафл намоз ўқиб, сўнгра ўтирардилар. Одамлар у кишига келиб салом беришар эди” (Имом Бухорий, Имом Муслим, Имом Аҳмад ривояти).
Қаранг, бу жуда ҳам осон, аммо савоби улкан, гуноҳларни кетказувчи, жаннатга етказувчи бўлган амалдир. Лекин дангасалигимиз, бепарволигимиз оқибатида бунга эътибор бермаймиз, амал қилмаймиз. Кўпчилигимиз ҳатто билмаймиз ҳам. Аввал билмасак, энди билиб олдик. Энди билганимизга амал қилайлик ва бошқаларга ҳам етказайлик.
Зеро, Расулуллоҳ соллаллоҳу алайҳи васалламнинг суннатларини ёйилишига хизмат қилиш у зотга бўлган муҳаббат ва эҳтиромнинг юксак намунаси ҳисобланади. У зот соллаллоҳу алайҳи васаллам суннатларини аниқлик билан етказганларнинг ҳаққига: “Менинг гапимни эшитиб, ёдлаб, сингдириб, сўнгра етказган одамни Аллоҳ неъматлантирсин”, деб дуо қилганлар (Имом Термизий ривояти).
Келинг, биз ҳам Расулуллоҳ соллаллоҳу алайҳи васалламнинг суннатларига мувофиқ сафардан қайтишда масжидга киришга одатланайлик.
Аллоҳ таоло барчамизга ҳар бир ишда Расулуллоҳ соллаллоҳу алайҳи васалламнинг суннатларига амал қилишимизга тавфиқ ато этсин, омийн!
Аллоҳумма солли ва саллим ъала Муҳаммадин ва ъала оли Муҳаммад
Даврон НУРМУҲАММАД
2026 йил 28 октябрь куни Қашқадарё вилоятида имом-хатиблар, имом-ноиблар ҳамда отинойилар иштирокида йиғилиш бўлиб ўтди. Йиғилишни Ўзбекистон мусулмонлари идорасининг Қашқадарё вилоятидаги вакили, вилоят бош имом-хатиби олиб борди. Унда Ўзбекистон мусулмонлари идораси Кадрлар бўлими бошлиғи Салоҳиддин Шерхонов ҳамда Ички назорат бўлими бошлиғи Акбар Дўсматов иштирок этди.
Йиғилиш давомида диний соҳа вакиллари фаолиятида ижро интизомига қатъий риоя этиш, белгиланган вазифаларни ўз вақтида ва сифатли бажариш, амалга оширилаётган ишларнинг самарадорлигини янада ошириш масалаларига алоҳида эътибор қаратилди. Шунингдек, фуқароларнинг мурожаатлари билан ишлаш тизимини такомиллаштириш, ҳар бир мурожаатга масъулият ва эътибор билан ёндашиш, аҳоли билан мулоқотни кучайтириш муҳим вазифалардан экани таъкидланди.
Йиғилишда имом-хатиблар, имом-ноиблар ва отинойилар ўз фаолияти давомида аҳолига янада яқин бўлиши, маҳаллаларда маънавий-маърифий ишлар самарадорлигини ошириши, оилаларда соғлом маънавий муҳитни мустаҳкамлашга ҳисса қўшиши, ёшлар тарбиясига алоҳида эътибор қаратиши ҳамда жамоатчилик билан ҳамкорликни кучайтириши лозимлиги қайд этилди. Шу билан бирга, диний соҳа ходимларидан хизмат вазифаларига масъулият билан ёндашиш, одоб-ахлоқ қоидаларига риоя этиш, аҳоли ўртасида бағрикенглик, ҳамжиҳатлик ва маънавий қадриятларни тарғиб қилиш борасидаги ишларни изчил давом эттириш сўралди.
Йиғилиш якунида белгиланган вазифалар ижросини таъминлаш, ижро интизомини мустаҳкамлаш, мурожаатлар билан ишлашда масъулиятни ошириш ҳамда диний соҳа вакиллари фаолияти самарадорлигини янада юксалтириш юзасидан тегишли вазифалар белгилаб олинди.
ЎМИ Қашқадарё вилояти вакиллиги
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 